65 kelige deıin salmaq dárejesinde Shadııar Pernesh Sýrdlımpıada chempıony atandy. Fınaldyq beldesýde ol ırandyq Keıvan Rostamabadıdi 4:2 esebimen jeńip, Qazaqstanǵa osy kúres túrinde jalǵyz altyn medaldi alyp keldi. Shıelenisti fınal sońynda Pernesh óz emosııasyn jasyrmady. Onyń aıtýynsha, bul altyn – óziniń sporttyq jolyndaǵy «eń kóp kútken ári eń qymbat» jeńisi.
57 kelige deıin salmaqta fınalǵa shyqqan Ǵabıt Esjanov ırandyq Mohammad Shıavoshımen beldesip, 6:15 esebimen ese jiberdi. Osy nátıjemen ol Sýrdlımpıadanyń kúmis júldegeri atandy.
Qazaqstan qorjynyna úsh qola medal tústi:
• Ǵasyr Turǵynbaı (74 kg) aldymen beıtarap sportshy Alekseı Kalesnyıdy 22:8 esebimen jeńip, keıin Denıs Tregýbenkomen bolǵan qola úshin beldesýde 11:0 nátıjesimen basym tústi.
• Sabyrjan Rsaly (86 kg) grek balýany Nıkolaos Iosıfıdısti 16:5 esebimen utty.
• Qaırathaan Shonqý (125 kg) úndistandyq Gan Shıamdy 12:1 esebimen tehnıkalyq basymdyqpen jeńip, qola medal ıegeri atandy.
97 kelige deıin salmaqtaǵy qola beldesýinde Beksultan Malaıdar ırandyq Erfan Sattarıge jol berdi.
QR Ulttyq Sýrdlımpıada komıtettiń vıse-prezıdenti Azamat Qarlyǵashev qazaqstan sportshylarynyń nátıjelerine joǵary baǵa berdi.
«Bul Sýrdlımpıada Qazaqstan úshin tarıhı sátterge toly boldy. Búgingi jeńister kezdeısoq nátıje emes, bizdiń sportshylardyń jańa deńgeıge kóterilgeniniń dáleli. Jigitterdiń kúres máneri, minezi, senimdiligi aıqyn ózgergenin kórip otyrmyz. Bul búkil el úshin úlken jetistik. Aldaǵy jarystarǵa da serpin beretinine senimdimin», dedi ol.
