Elimizdiń túkpir-túkpirinen kelgen sheberlerdi, sýretshiler men quraq quraý óneriniń úzdikterin biriktirgen mańyzdy mádenı oqıǵa joǵary deńgeıde ótti.
Toqyma óneriniń baı dástúrin pash etken týyndygerlerge alǵysyn bildirgen pechvork tigisi qaýymdastyǵynyń prezıdenti, jobanyń bastamashysy ári kórme uıymdastyrýshysy T.B. Shtrosherer, aıtýly óner adamzat mádenıetinde aıshyqty mánge ıe ekenin atap ótti.
Is-sharada Ulttyq ortalyq mýzeı dırektorynyń mindetin atqarýshy Serjan Sarov quttyqtaý sóz sóılep, kóne qazaq óneri – quraqtyń jańǵyrýynyń mańyzyna toqtalyp, onyń ýaqyttar sabaqtastyǵyn saqtaı otyryp, qazirgi sheberlerdiń jumystarynda kórinis taýyp otyrǵanyn málimdedi.
Saltanatty bólimge halyqaralyq qazylar alqasy – Marsel Ramseıer (Shveısarııa), Natalıa Krıves (Fransııa), Dmıtrıısh Dzıbalov (Qazaqstan), Natalıa Mametnııazova (Qazaqstan) jáne Tamara Shtrosherer (Germanııa) qatysyp, «Álemderdi toǵaıtý: pechvork — mádenıetter dıalogy» konkýrsynyń jeńimpazdaryn BERNINA (Shveısarııa), CROWN (Germanııa) «Tigin Mashınalary Úıi» kompanııalary usynǵan baǵaly syılyqtarmen marapattady.
Kórmede Natalıa Krıves jınaǵan kóne qazaq kilemderiniń biregeı toptamasy, sondaı-aq túskıiz, quraq, pechvork jáne art-kvılt shyǵarmalary usynyldy. Bul ekspozısııa 2025 jyly Sent-Marı-o-Mınde (Fransııa) ótken otyzynshy mereıtoılyq festıvalda zor jetistikke jetken bolatyn. Bul festıval — Japonııanyń Tokıo jáne AQSh-tyń Tehas shtaty, Hıýston qalasyndaǵy festıvalderden keıingi toqyma ónerindegi álemdegi eń iri úsh oqıǵanyń biri.
Kórmede otandyq jetekshi kvıltıng jáne pechvork sheberleriniń jeke kórmeleri de tanystyryldy. Olardyń qatarynda N. Dıachenko, N.Mametnııazova, Z. Belgibaeva, M. Týrlybekova, G. Sýrnına qatarly sheberler bar.
Joba aıasynda «Álemderdi toǵaıtý: pechvork — mádenıetter dıalogy» atty konkýrs kórmesi uıymdastyrylyp, onda júzdegen matanyń qıyqtarynan qurastyrylǵan biregeı polotnolar halyqtar dostyǵynyń sımvoly retinde kórinis tapty.
Qonaqtar úshin lotereıa oınatylyp, ulttyq kıimder kórsetilimi jáne «Tigin Mashınalary Úıiniń» tájirıbeli keńesshileri jetekshilik etken, zamanaýı jabdyqtarmen loskýt tigisi boıynsha sheberlik sabaqtary ótkizildi.
