Sýretti túsirgen – avtor
Ádette aýyl turǵyndary jýrnalısterdi qandaı da problemasyn sheship berý úshin shaqyrar edi. Bul jerdiń azamattary aıadaı ǵana aýyldyń jetken jetistigin aýyz toltyra aıtqysy kelipti.
Ýkraınka aýylyna kire berip edik, qos qaptalyndaǵy qarqyn alǵan qurylysqa qarap rıza bolystyq. Biryńǵaı sáýletti shaǵyn baspanalardy «Vostok moloko» JShS basshylyǵy jumysshylaryna arnap salyp jatyr desti. Tórgi jaqta eski mádenıet úıin súrip tastap, ornyna jańasyn jáne kótergen. II-dúnıejúzilik soǵysqa arnalǵan obelısk te kásipkerdiń kómegimen jańalanypty. Shyntýaıtyna kelsek, aýyldyń shyraıyn kirgizip otyrǵan osynaý jalǵyz kásiporyn. Jarnamalaýdan aýlaqpyz. Aqıqaty sol. Basshysy Seıiljan Saılaýbaevtyń qarapaıymdylyǵy sondaı, aýylǵa jaqsylyq jasaý paryzym dep, suhbat berýden basyn ala qashqan. О́ndiris oshaǵy týraly tipti jaq ashqysy kelmedi. Alaıda, «Vostok moloko» kásiporny sút ónimderiniń júzden astam túrin shyǵarady. Shıkizattyń azdy-kópti bóligi kórshi elden kelse, belgili bir bóligimen kásiporyn qaramaǵyndaǵy saýyn ferma qamtyp otyr. Tańǵalǵanymyz, bul fermadaǵy 500-600 sıyrdy robot saýady. Robottalǵan tehnologııany eki-aq adam basqarady. Qoranyń tazalanýy da avtomattandyrylǵan. Qora deıin deseń, aınadaı jarqyrap jatyr.
– Qarapaıym tilmen aıtsam, saýyn avtomattandyrylǵan qurylǵy arqyly júzege asady. Ýaqyt taıaǵanda naýaǵa túıirshikti jem túsip, sıyrlar soǵan umtylady. Kezegimen qorshaýǵa kiredi. Olardy aýyldaǵydaı qýalap, qarasannyń astyna almaısyń. Bári zamanaýı basqarylady. Moıyndaryndaǵy qarǵybaýy arqyly sıyrdyń densaýlyǵy qadaǵalanyp otyramyz, – deıdi ferma jetekshisi Nurbolat Sosıalov.
Atalǵan seriktestikte Ýkraınka aýylynan uzyn sany 150-deı adam jumys isteıdi. Sút-taýarly fermasy úshin qat mamandar azyq-túlikpen, kıim-keshekpen qamtylady. Tipti baspana da beriledi. Ferma jetekshisi Nurbolat Sosıalov otbasymen osy aýylǵa Tarbaǵataıdan kóship kelip, baspanaly bolǵan. Úıi jaıly, jyly. Kásiporyn basshysy taǵy birneshe úı kóterip jatyr. Buǵan deıin soqqan mádenıet úıi de aýyldyń qaq ortasynda jarqyrap tur. Mereke-meıramnyń bári sonda toılanady.
– Bizdiń mádenıet úıimiz naǵyz mádenıettiń ortasy bolsa eken deımiz. Kóp jyl klýbsyz otyrǵan aýyl úshin bul úlken qýanysh boldy. Konsert, kórme sekildi is-sharalardy osynda ótkizemiz. Sonymen qatar klýbqa japsarlas kitaphana men medısınalyq pýnkt te jumys istep tur. Osynyń bári Seıiljan Jırenulynyń arqasy. Bútin bir aýylǵa jaǵdaı jasap otyrǵan azamatqa «Qazaqstannyń Eńbek Eri» sekildi ataq berse de jarasady, – dep, alǵysyn bildirgen aýyldyq klýbtyń meńgerýshisi Marına Býrkovskaıa.
Ol kisige aýyldyqtardyń alǵysy sheksiz. Ushyrasa ketken ár turǵyn aýyldyń erteńine nyq senimmen qaraıdy. Onyń ústine, Ertistiń jaǵasyndaǵy quıqaly jerden kóshkisi joq. Qazirgi kúnde Ýkraınka aýylynda 353 tútin bar desek, sonyń jartysy «Vostok moloko» kásipornynda jumys isteıdi. Aıtqandaı, bul óndiris oshaǵynyń ónimderi aýyl turǵyndaryna jeńildetilgen baǵamen usynylady. Elimizdiń ár aýylynda osyndaı kásiporyn bolsa, halyqtyń ál-aýqaty áldeqaıda joǵary bolar ma edi dersiz.
Okrýgti aralaı júrip, óńirdiń ótkeni men búginin bes saýsaqtaı biletin aqsaqal Qabdyǵalı Maǵaýııaulymen tildestik. Eńbekke erte aralasqan ol nebári 29 jasynda III-dárejeli «Dańq» ordenimen marapattalǵan eken. Búginde Ýkraınka aýylynyń áleýetin arttyrýǵa úles qosyp kele jatqan Seıiljan Saılaýbaevpen de qyzmettes bolǵan. Ol da Seıiljan Jırenulynyń ushan teńiz eńbegin aıtyp, tańdaı qaǵyp otyr. Aıtýynsha, áne-mine jumysy turalap qalady degen sút-taýarly fermasyn qaıta aıaqtandyryp, búginde elimizdiń mańdaıaldy kásipornyna aınaldyrǵan. Sol zamanda bazary tarqaı bastaǵan kásiporyndy saqtap qalmaǵanda, aqqýly meken búgingideı gákkýli bolar ma edi?
Shyǵys Qazaqstan oblysy,
Ulan aýdany,
Ýkraınka aýyly
