Senat tóraǵasy Máýlen Áshimbaev atap ótkendeı, dene shynyqtyrýdy, buqaralyq jáne ınklıýzıvti sportty damytý, osy baǵytta qajetti jaǵdaı jasap, tıisti ınfraqurylymdy qamtamasyz etý – memlekettik saıasattyń basym baǵyttarynyń biri. Osylaısha Taldau Community elimizde Memleket basshysynyń bastamasymen atalǵan salada júzege asyrylyp jatqan keshendi ózgeristerdi dáripteýge belsendi úles qosyp otyr.
«Prezıdent Qasym-Jomart Toqaevtyń tapsyrmasymen barlyq óńirde buqaralyq sport keńinen dáriptelip, qajetti ınfraqurylymmen qamtamasyz etý jumystary júrgizilip keledi. Sonyń aıasynda dene shynyqtyrý men sportty damytýdy kózdeıtin keshendi is-sharalar da iske asyp keledi. Igi dástúrge aınalǵan Taldau Run-ǵa alǵashqy óńirlik jobamyz – Qaraǵandy Taldaý mektebiniń tyńdaýshylary da qatysyp otyr. Bizdiń bastamamyz jyldamdyq pen nátıjeni anyqtaıtyn jarys emes. Bul – salamatty ómir salty, úılesimdi damý, judyryqtaı jumylý, ózara qoldaý, únemi izdený sııaqty qundylyqtardy dáripteıtin qadam», dep M.Áshimbaev sporttyq is-sharany ótkizýge qoldaý kórsetkeni úshin Astana qalasynyń ákimdigine alǵys bildirdi.
Aıta keter jaıt, bul joly Taldau Run Taldaý mektebiniń besinshi legine ótinimder qabyldaýdyń bastalýymen tuspa-tus keldi. Atalǵan jobaǵa qatysqysy kelgender óz ótinimderin taldaucommunity@gmail.com poshtasyna jiberýge bolady.
Taldaý mektebi aıasyndaǵy oqý dástúrge sáıkes kelesi jyldyń qańtar aıynda bastalyp, segiz aptaǵa jalǵasady. Joba memlekettik basqarý, áleýmettik jáne gýmanıtarlyq zertteýler, BAQ sııaqty salalarda taldaý, saraptaý tásilderin jetildirýge arnalǵan.
