Prezıdenttiń Qazaqstandy negizgi kólik-logıstıkalyq torapqa aınaldyrý jónindegi tapsyrmalaryn oryndaý sheńberinde elimizde bes iri transshekaralyq hab júzege asyrylyp jatyr. Bes transshekaralyq hab – shıkizattyq emes taýarlar eksportyn 30%-ǵa ulǵaıtýǵa múmkindik beredi.
Bul týraly Úkimet otyrysynda saýda jáne ıntegrasııa mınıstri Arman Shaqqalıev aıtty. Ol búgingi tańda barlyq baǵyt boıynsha basqarýshy kompanııalar anyqtalyp, ınfraqurylymdar qurylysy qarqyndy júrip jatqanyn baıandady.
Atap aıtqanda, О́zbekstanmen shekarada elder arasyndaǵy taýar aınalymyn $10 mlrd-qa deıin jetkizýge arnalǵan «Ortalyq Azııa» halyqaralyq ónerkásiptik kooperasııa ortalyǵy qurylady. Elimizdiń shyǵysynda «Qorǵas» HShYO» men «Qorǵas – Shyǵys qaqpasy» arnaıy ekonomıkalyq aımaqtaryn biriktiretin Qorǵas toraby damyp keledi. Munda Qytaımen ótkizý qabiletin arttyrý úshin SkyHansa halyqaralyq áýejaıy jáne jańa logıstıkalyq keshender salynady.
Arman Shakqalıevtiń aıtýynsha, osylarmen qatar Kaspıı torabyn damytý boıynsha da jumystar júrgizilip keledi, onda Aqtaý jáne Quryq porttarynda konteınerlik hab pen «Sarja» kópfýnksıonaldy termınalynyń qurylysy boı kótermek. Batys boıynsha BQO-da Reseıge eksportqa baǵdarlanǵan «Eýrazııa» transshekaralyq saýda ortalyǵy jumys istep tur. Al Jambyl oblysynda «Batys Eýropa – Batys Qytaı» baǵdarynda Indýstrııalyq saýda-logıstıkalyq keshen qurylady. Ol Qyrǵyzstanmen shekarada taýar aǵyndaryn óńdeýdi jáne bólýdi qamtamasyz etedi.
«Biz ınvestısııalyq jobalardy júzege asyrýdyń belsendi kezeńine aıaq basqaly otyrmyz. Bul kezeńde jobalardy naqty iske qosýǵa, logıstıkalyq múmkindikterdi keńeıtýge jáne bıznesti kooperasııanyń jańa formattaryna tartýǵa basa nazar aýdarylatyn bolady. Bul habtardy iske qosý shekara mańyndaǵy memlekettermen saýda prosesterin edáýir jedeldetýge, shıkizattyq emes eksport kólemin 30%-ǵa arttyrýǵa jáne qazaqstandyq kompanııalar úshin tıimdi logıstıkalyq jaǵdaılardy qamtamasyz etýge múmkindik beredi», dep atap ótti mınıstr.
