Foto: ashyq derekkóz
Ulttyq bıýro statıstıkasynyń dereginshe, jyljymaıtyn múlikke qatysty qyzmet kórsetý sektory sońǵy bes jyl boıy úzdiksiz ósip keledi. Tek pandemııanyń alǵashqy jyly 12 paıyzdyq tómendeý baıqalǵan, al keıingi jyldary naryq jyl saıyn 20 men 39 paıyz aralyǵynda ósim kórsetken.
О́ńirler arasynda Almaty aıqyn kósh bastap tur. 2025 jyldyń alǵashqy jartysynda el boıynsha tirkelgen ósimniń basym bóligi osy qalaǵa tıesili. Almaty qyzmet kólemin 73,8 paıyzǵa arttyryp, 608,8 mlrd teńgege jetkizdi. Bul respýblıka naryǵynyń 44,2 paıyzy. Ekinshi orynda Astana tur: 257,1 mlrd teńge, ósim 26,7 paıyz. Sondaı-aq Shyǵys Qazaqstan, Atyraý jáne Qaraǵandy oblystary alǵashqy bestikte.
Sektor ishindegi eń tabysty baǵyt – turǵyn úıdi jalǵa berý jáne basqarý qyzmetteri. Onyń kólemi 681,5 mlrd teńgege jetip, ótken jylmen salystyrǵanda 29,6 paıyzǵa kóbeıdi. Ofıstik ǵımarattardy jalǵa berý jáne basqarý baǵyttary da aıtarlyqtaı úleske ıe, biraq kólemi turǵyn úı sektorynan úsh ese az – 180,9 mlrd teńge.
Eń joǵary ósim saýda jáne kópfýnksııaly ortalyqtardaǵy jalǵa berý qyzmetterinde tirkeldi. Bul segment bir jylda jeti esege jýyq ósip, 24,9 mlrd teńgeden 176,3 mlrd teńgege deıin ulǵaıdy.
Qyzmet kóleminiń artýyna birneshe faktor áser etken. Birinshisi – jalǵa alý baǵasynyń qymbattaýy. Biraq baǵa 4 pen 10,5 paıyz aralyǵynda ǵana ósken. Ekinshi faktor – jalǵa beriletin nysandar sanynyń jáne aýdanynyń kóbeıýi. 2025 jyly paıdalanýǵa berilgen jańa kommersııalyq ǵımarattardyń jalpy aýdany 2,2 ese artqan: byltyr 2,3 mln sharshy metr bolsa, bıyl bul kórsetkish 4,9 mln sharshy metrge jetken. Saýda nysandary 59,3 paıyzǵa, mádenı oıyn-saýyq oryndary 84,4 paıyzǵa, ofıs ǵımarattary 22,5 paıyzǵa artty.
Aıta keterligi, naryqta ishki qurylymdyq ózgerister de baıqalady. Sońǵy bir jylda osy salada qyzmet kórsetetin kompanııalar men jeke kásipkerler sany 28 paıyzǵa azaıyp, 6,9 myńǵa tústi. 2024 jyly 4,3 myń jeke kásipker tirkelgenimen, olardyń úlesi jalpy qyzmet kóleminiń 27,1 paıyzyn ǵana qurady. Kerisinshe, qyzmettiń 72,9 paıyzy zańdy tulǵalarǵa tıesili boldy.
