Ulttyq statıstıka bıýrosy kompıýter, noýtbýk jáne ózge de sıfrlyq mashınalar óndirisi byltyr birden 2,3 esege óskenin aıtady. Alaıda bıylǵy kórsetkish keri burylyp, tómendeý baıqaldy. Sońǵy on jyldaǵy eń joǵary óndiris kólemi 2020 jylǵa tıesili. Ol kezde pandemııa saldarynan qashyqtan oqý men jumys keń taralyp, suranys kúrt artqan bolatyn. Sol jyly 29,9 myń dana tehnıka óndirildi.
Qańtar men tamyz aralyǵyndaǵy málimetterge súıensek, otandyq kásiporyndar kompıýterge degen ishki suranystyń 29,7 paıyzyn ǵana óteı aldy. Qalǵan 70,3 paıyzy ımport esebinen jabyldy. Qazaqstanǵa 27,6 myń kompıýter men noýtbýk ákelinse, otandyq óndiris kólemi 11,6 myń dana boldy. Bul ótken jylmen salystyrǵanda 30 paıyzǵa az.
Eksport kólemi de tómendedi. Bıyl 577 dana kompıýter syrtqa jóneltildi, bul ótken jylǵa qaraǵanda 22,6 paıyzǵa az. Ishki naryqtaǵy satylym da 30,6 paıyzǵa kemip, 38,6 myń dana deńgeıinde qalyp otyr.
Importtyń basym bóligi Qytaıǵa tıesili. Elimizge ákelingen kompıýterlerdiń 90,5 paıyzy, ıaǵnı 25 myń dana Qytaıdan jetkizilgen. Qalǵan bóligi О́zbekstan men Reseıden kelgen. Eksportta da negizgi baǵyt – Qyrǵyzstan bolyp otyr. 327 dana tehnıka osy elge jóneltilgen. Odan keıingi oryndarda Reseı men О́zbekstan tur.
Bıyl elimizge kompıýterden bólek, 449,8 myń noýtbýk pen 22,8 myń jeke kompıýter júıeleri ımporttaldy. Bulardyń da 90 paıyzdan astamy Qytaı óndirýshilerine tıesili.
Álemdik kórsetkishter de Qytaıdyń absolıýt ústemdigin kórsetedi. World’s Top Exports saıtynyń dereginshe, 2024 jyly álem boıynsha kompıýter eksporty 532,5 mlrd dollar boldy. Onyń 160,7 mlrd dollary tek Qytaıǵa tıesili. Bul jalpy kólemniń úshten biri. Tek jeke kompıýterdiń ózi 6,9 mln dana kóleminde syrtqa shyǵarylǵan.
Qytaıdan keıingi oryndarda Taıvan, AQSh jáne Gonkong tur. Al Qazaqstan kompıýter eksportynda álem boıynsha 49 orynǵa jaıǵasqan. Elimizdiń byltyrǵy kompıýter jáne sıfrlyq mashınalar eksporty 97,7 mln dollardy qurady. Bul kórsetkish Qazaqstandy Reseı, О́zbekstan jáne Qyrǵyzstannan joǵary orynǵa shyǵaryp otyr.
