Osy kitaphanaǵa kelgennen bastap, men zaǵıp jandarmen etene aralasyp, olardyń ishki álemin, qyzyǵýshylyqtaryn tereń túsinýge múmkindik aldym.
Jambyl oblystyq kózi kórmeıtin jáne álsiz kóretin azamattar kitaphanasynyń basty maqsaty – múmkindigi shekteýli jandardy qazirgi zamandaǵy qajetti aqparatty izdeýge, tájirbıelik qyzmetti paıdalanýǵa baǵyttaý jáne áleýmettik mádenı ómirge beıimdeý. Kitaphana óz jumysyn ınklıýzıvti baǵytta júzege asyryp, árbir oqyrmanǵa jeke kózqaras pen erekshe qyzmet kórsetýge umtylady.
О́ńirde 1 oblystyq arnaıy kitaphana jáne aýdandyq ortalyqtandyrylǵan kitaphanalarda 9 aýdandyq kózi kórmeıtin jáne álsiz kóretin azamattarǵa arnalǵan bólimder bar. Jambyl oblystyq kózi kórmeıtin jáne álsiz kóretin azamattar kitaphanasynda 4 bólim, 1 sektor jumys istep tur. Bizdegi oqyrman sany – 3000, onyń ishinde zaǵıptar sany – 935. Kitap qory – 40558, onyń ishinde memlekettik tilde 19672 dana kitap bar.
Kitaphana jumysyn ınklıýzıvti baǵytta uıymdastyrý úshin birneshe mańyzdy jobalar júzege asyryldy. Osy jobalardyń nátıjesinde, kitaphana qyzmeti múgedektigi bar adamdarǵa qajetti bilim berý men mádenıetti ıgerý úshin keń múmkindikter usyný maqsatynda ınklıýzııa baǵytyndaǵy 13 joba 2 úıirme jumys isteıdi. «Tıflomýzeı», «Qaýipsizdikti saqtaıyq», «Kenes time», «Tiflo-ashana», sekildi ózge de jobalardyń biz úshin mańyzy zor.
«TIFLO-ASHANA» jobasy aıasynda «Anama arnalǵan aq dastarhan» oblystyq baıqaýy ótkizildi. «Inklıýzııa jáne teatr» jobasy aıasynda «Júrekpen oqyǵan shyǵarmam» atty alǵashqy ınklıýzıvtik teatr baıqaýy uıymdastyryldy. Oǵan óńirimizdiń zaǵıp balalary men jasóspirimder qatysty.
«Áýlıeata – kitap oqıtyn óńir» jobasy aıasynda Uly Jeńistiń 80 jyldyǵyna oraı «Biz jeńistiń urpaqtarymyz» atty Braıl júıesinde esse jazýdan respýblıkalyq baıqaýy ótti. Baıqaýda Qazaqstannyń ár aımaǵynan, naqtyraq aıtsaq, Jambyl oblysy, Almaty, Pavlodar, Astana, Shymkent qalalarynan 50-den astam zaǵıp qatysýshylarynyń jumystary usynylyp, jeńimpaz atanǵan qatysýshylar baǵaly syılyqtarmen marapattaldy, nátıjesinde 200 oqyrman qatysyp, 70 kitap usynyldy.
Oblys ákimi Erbol Qarashókeevtiń bastamasymen «Áýlıeata – kitap oqıtyn óńir» aksııasy aıasynda jyl basynan 4 myńǵa jýyq oqyrmannyń qatysýymen memlekettik merekelerge, aıtýly kúnderge, jazýshylardyń, aqyndar men qoǵam qaıratkerleriniń mereıtoılaryna arnalǵan 122 is-shara ótkizildi. Kesh qonaqtarynyń eńbekterin nasıhattaý maqsatynda zaǵıptarǵa arnalǵan Braıl qarpindegi aýdarmalary jáne aýdıotaspa kitaptary shyǵarylyp otyrady.
Oblystyq kózi kórmeıtin jáne álsiz kóretin azamattar kitaphanasy múmkindigi shekteýli azamattarǵa sheksiz múmkindikter usynyp, olardyń bolashaqqa degen senimin nyǵaıtý úshin aıanbaı eńbek etip júr. Bizde múmkindigi shekteýli 4 qyzmetker jumys isteıdi. Olardyń ishinde 2011 jyldan beri júıeli jumys atqaryp júrgen tıfologııa bóliminiń meńgerýshisi Erbol Aqqaıulynyń qyzmetine kópshilik dán rıza.
Erbol Aqqaıulynyń eńbekqorlyǵy men kásibıligine sóz joq. Alǵashynda kitaphana oqyrmany bolyp júrgen azamat, kitaphnadan Braıl qarpin úırenip bastady. Keıin ózi sekildi kóz janarynan aıyrylyp, taǵdyr taýqymetin tartqan jandarǵa bilgenin úıretýge kiristi. Alǵashynda zaǵıp balalarǵa arnalǵan mektep oqýlyqtaryn Braıl qarpine aýdarýdan bastaǵan ol kitaphana oqyrmandarynyń suranysyna qaraı keıin 2 myńǵa jýyq kitapty tárjimalady.
Erbol Aqqaıulynyń kásibı sheberligi men jumysyna degen súıispenshiligi ony saladaǵy úzdik mamandardyń birine aınaldyrdy. Ol zaǵıp jandarǵa Braıl qarpinde kitaptar aýdaryp qana qoımaı, olarǵa kompıýterlik saýattylyqty úıretip, árbir oqyrmanmen jeke jumys istep, onyń rýhanı qajettilikterin túsinýge tyrysady. Osylaısha, ol áleýmettik ınklıýzııany ilgeriletýge óz úlesin qosyp júr. Ol 2019 jyly Jambyl oblysynyń 80 jyldyq mereıtoıyna oraı «Oblysqa sińgen eńbegi úshin» tósbelgisin, 2021 jyly Ulttyq Akademııalyq kitaphanasynyń «Kitaphana isiniń úzdigi» tós belgisin, «Rýhanı qazyna – 2021» festıvalinde «Úzdik oblystyq mańyzy bar zaǵıp jáne nashar kóretin azamattarǵa arnalǵan kitaphana qyzmetkeri» nomınasııasyn, 2024 jyly Qazaqstan Respýblıkasynyń «Altyn juldyz» tósbelgisin ıelendi.
Áriptesim, úshinshi top múgedegi Shoıra Mırsharıpovanyń da jumysy kóńil toǵaıtady. Alǵashynda kitaphana redaktory bolyp qyzmet atqarǵan ol oqyrmandarmen tez til tabysyp, jumysty jandandyrdy. Keıin onyń kásibı jáne adamı qasıetteri joǵary baǵalanyp, abonement bólimine oqyrmandarǵa qyzmet kórsetý úshin aýystyryldy. Kitaphanashy retinde Shoıranyń eń basty qasıetteriniń biri – empatııa. Zaǵıp jandar kúndelikti ómirde kóptegen qıyndyqtarǵa tap bolady, sondyqtan olarmen jumys istegende, kitaphanashy olardyń ishki kúıin túsinip, qajetti qoldaý kórsetýi kerek. Shoıra óz qyzmetinde osy qasıetti joǵary deńgeıde ustanyp, ár oqyrmanǵa jan tánimen kómektesedi.
Onyń jumysyna tán erekshelikterdiń biri – oń qolynan aıyrylǵanyna qaramastan ol óz jumysyn kásibı turǵyda atqaryp otyr. Shoıranyń bul jumysyna degen adaldyǵy, kisiligi bizdi tánti etpeı qoımaıdy. Ol da birneshe úlken marapatqa ıe boldy.
Qalaı desek te bizde óz isine adal mamandar az emes. Múmkindigi shekteýli bolsa da, qarymy sheksiz azamattardyń jankeshtiligi kimge de bolsa úlgi dep paıymdaımyz.
Tolqyn Kúzenova, oblystyq kózi kórmeıtin jáne álsiz kóretin azamattar kitaphanasy dırektorynyń orynbasary.
Taraz
