Tarazda tótenshe jaǵdaı jarııalandy

TARAZ. 20 aqpan. Taraz qalasynda kúkirt qyshqyly quıylǵan vagondardyń temir joldan shyǵyp ketýine baılanysty tótenshe jaǵdaı jarııalandy. Bul týraly Jambyl oblystyq tótenshe jaǵdaı departamentiniń baspasóz hatshysy Sáýle Munataeva habarlady. Oqıǵa oblys aýmaǵyndaǵy Shaıqoryq jáne Býryl stansalarynyń arasynda oryn alǵan. Bul stansalar Taraz qalasyna taıaq tastam jerde. Kúkirt qyshqyly quıylǵan 7 sısterna temirjoldan shyǵyp ketip, onyń úsheýi janyna aýdarylǵan. Osynyń nátıjesinde bir sısternadan belgisiz mólsherde kúkirt qyshqyly tógildi. Reseıden shyqqan bul poıyz Taraz qalasynyń irgesindegi «Qazfosfat» kásipornyna barýy kerek eken. «Qazfosfat» – mıneraldy tyńaıtqyshtar shyǵaratyn alyp kásiporyn. 44 vagonnyń 15 sısternasyna kúkirt qyshqyly quıylǵan. Dál qazir kúkirt qyshqyly tógilgen jerde zalalsyzdandyrý jumystary júrip jatyr. Arnaıy qurylǵylardyń kómegimen túngi saǵat 04.15-te ishindegi suıyqtyǵy tógilgen sısterna ornynan qoıylyp, komıssııanyń tekserýi úshin zaýyt stansasyna jetkizildi. Oqıǵa ornynda oblystyń tótenshe jaǵdaı jónindegi qyzmetkerleri, órt sóndirýshiler, qutqarý qyzmeti, oblystyq, qalalyq, aýdandyq ákimdikterdiń qyzmetkerleri jumys isteýde. Oralhan Dáýit. Derek, sýret: Jambyl oblystyq tótenshe jaǵdaı departamentiniń baspasóz qyzmeti.