О́tken joly Otyrar kóshesi 1/2 mekenjaıyndaǵy astanalyq mýzeıler dıreksııasyna qarasty О́ner murajaıyna jolymyz túskende, osy bórik kózimizge ottaı basyldy. Bir zaldy tutasymen qamtyǵan mundaǵy ulttyq baskıimder avtory Ernar Aıtbaev «bóltirik bórik» dep tanystyrdy. Bóltiriktiń terisinen tigilgeni, jas balaǵa yqshamdalǵany birden baıqalady. Sonda avtordyń myna bir deregine qaıran qaldyq.
«Bórik sóziniń ózi bóri degen sózden shyqqan. Sondyqtan ulttyq baskıim ataýynyń ózi eń ejelgi tanym-túsinikterden bas tartyp, búginge jalǵasyp otyr. Al jas balalarǵa arnaıy tikken «bóltirik bóriktiń» jóni bólek. Bálen myńjyldyq tarıhy bar halqymyz osynshama keńistikti aqyl-parasaty men qaısarlyǵynyń arqasynda ǵana ustap tura alǵan. Sondyqtan balalary jasynan qaısar, qaıtpas minezdi bolyp óssin dep basyna bóltirik terisinen bórik tigip kıgizgen», dedi Ernar Aıtbaev.
«Bóriniń bóltirigi jap-jas Noıan» dep jyrlaıtyn edi ǵoı «Batyr Baıan» poemasynda Maǵjan Jumabaıuly. Baıaǵyda nebir ańshylar bóriniń qaısar minezine qaıran qala áńgimelep otyrǵanyna qaraǵanda, aqylǵa qonatyn sóz. Qansha qaqpanǵa tússe de, qasqyr qyńsylap jatpaıtyn kórinedi. Tilerseginen qıyp, sıraǵyn qaldyryp ketetinin aıtatyn qaqpanshylar. Basqa ań ataýly sińiri men terisine ilinip jatady eken. «Al belinen tússe she?» deımiz ǵoı. «Ondaı keshelikke baratyn qasqyr aqymaq emes» dep tyıyp tastaýshy edi.
«Balany jastan» deıtin babalar urpaq tárbıesine tereń mán bergeni tánti etpeı qoımaıdy. Qanshama syr búkken «bóltirik bóriktiń» bir sıpaty – osy.
Bekjan BAQYT
