Sýret: profit.kz
«Alem.Cloud» sýperkompıýteri álemdegi eń qýatty júıelerdiń TOP-500 reıtıngine enip, 86-oryndy ıelendi. Bul onyń óńirdegi eń iri esepteý ortalyǵy retindegi mártebesin rastaıdy.
Endi memlekettik organdar, ǵylymı jáne bilim berý uıymdary, startaptar, jeke kompanııalar, sondaı-aq «Astana Hub» rezıdentteri «Alem.Cloud» resýrstaryn paıdalana alady. Jasandy ıntellekt jáne sıfrlyq damý mınıstrligi jasandy ıntellektini damytýdyń ulttyq mindetteri men jobalardyń strategııalyq mańyzyn eskere otyryp, sýperkompıýter resýrstaryn bólý erejelerin ázirledi.
Sýperkompıýterdi paıdalanýdyń basym baǵyttaryna memlekettik basqarý, bilim berý, densaýlyq saqtaý, aýyl sharýashylyǵy men sý resýrstary, munaı-gaz salasy, taý-ken metallýrgııa kesheni, energetıka, geologııa jáne barlaý, kólik pen logıstıka, ónerkásip, qurylys, robottehnıka men drondar, kıberqaýipsizdik, sondaı-aq qarjylyq tehnologııalar kiredi.
Platforma arqyly ótinim berý úshin qoldanýshy siltemege ótip, qajetti resýrstardyń kólemin (GPU), CPU, RAM, SSD tańdaıdy, sondaı-aq jalǵa alý merzimin kórsetedi jáne jobanyń sıpattamasyn engizedi. Platformada qajetti konfıgýrasııany eseptep, qunyn shyǵaratyn arnaıy kalkýlıator qarastyrylǵan. Árbir ótinim zańdy tulǵanyń elektrondyq sıfrlyq qoltańbasymen rastalady.
Ulttyq sýperkompıýter esepteý resýrstarynyń turaqty ári úzdiksiz jumysyn qamtamasyz etedi. Qyzmetter táýlik boıy qoljetimdi, derekter rezervtik kóshirmelermen qorǵalǵan, al SLA talaptarynyń saqtalýy júıeniń qoljetimdiligi men túsinikti bolýyna kepildik beredi. Bul kompanııalar men uıymdarǵa óz jobalaryn senimdi túrde josparlap, tıimdi júzege asyrýǵa kómektesedi.
