Foto: AFP via Getty Images
Qala bıligi órtke baılanysty abaısyzda kisi óltirý kúdigimen úsh adamdy ustaǵanyn habarlady. Polısııanyń málimetinshe, 52 men 68 jas aralyǵyndaǵy bul azamattar ǵımaratta jóndeý jumystaryn júrgizgen qurylys kompanııasynyń qyzmetkerleri. Onyń ishinde ekeýi kompanııa basshysy, taǵy bireýi ınjener keńesshi. Tekserý barysynda ǵımarattyń syrtqy qabatynda otqa tózimsiz materıaldar qoldanylǵany anyqtaldy.
Polısııa ókili kompanııa jetekshileriniń óreskel nemquraılylyǵy órttiń jyldam taraýyna sebep bolyp, úlken apatqa ákelgenin aıtty.
Keshenniń 65 jastaǵy turǵyny AFP agenttigine bergen suhbatynda bul úıde 40 jyldan beri turatynyn, al kórshileriniń kópshiligi egde jastaǵy adamdar ekenin jetkizdi.
Onyń aıtýynsha, jóndeý jumystary saldarynan terezeler jabyq turǵan. Keı turǵyndar órt shyqqanyn baıqamaı qalǵan. Olarǵa kórshileri telefon shalyp, dereý evakýasııalanýdy eskertken.
О́rt keshendegi 8 korpýstyń jeteýin sharpydy. Jalyndy sóndirýge 700-den astam qutqarýshy jumyldyrylǵan. Apattan keıingi tańerteń de birneshe oshaqty oqshaýlaý jumystary jalǵasqan. О́rt ǵımaratta jóndeý júrgizilip jatqan sátte tutanǵan. Naqty sebebi belgisiz.
Gonkong ákimshiliginiń basshysy Djon Lı beısenbi tańerteń 279 adamnyń iz-túzsiz joǵalǵany jóninde aqparat berdi. Keıin órt sóndirý qyzmeti olardyń birqatarymen baılanysqa shyqqanyn habarlady. Tótenshe jaǵdaıdan keıin 900-den astam adam ýaqytsha ornalastyrý oryndaryna jetkizildi.
Qytaıdyń memlekettik CCTV telearnasy QHR Tóraǵasy Sı Szınpın qaza tapqandar men zardap shekkenderdiń otbasylaryna kóńil aıtqanyn habarlady.
О́rt týraly habar sársenbi kúni jergilikti ýaqytpen 14:51-de túsken. Qaýiptilik deńgeıi eń joǵarǵy besinshi sanatqa baǵalanǵan. Polısııa jaqyn mańdaǵy úılerdi tolyq evakýasııalady.
Keı turǵyndar órttiń tym aýqymdy bolyp ketkenine narazy. Olar bıliktiń áreketin synǵa alyp, órt sóndirý bólimshesi dál janynda turǵanyna qaramastan, jalynnyń tez taralǵanyna qatty qynjylys bildirdi.
Oqıǵa ornyndaǵy sýretterde ǵımarattardyń bambýk qurylys qańqalarymen oralǵany baıqaldy. Mundaı qańqalar metaldan jeńil ári tez jınalǵanymen, qaýipsizdik erejeleri boıynsha olardan birtindep bas tartý týraly sheshim osy kóktemde qabyldanǵan.
Wang Fuk Court kesheni 1983 jyly teńiz jaǵasyna jaqyn aımaqta salynǵan. 8 bloktan turatyn keshende 1984 páter bar. 2021 jylǵy sanaq boıynsha munda 4600-ge jýyq adam turǵan.
Qytaı qyzmetine suhbat bergen okrýg depýtaty Mýı Sıý fýn órt jóndeý jumystary júrip jatqan jeti blokty sharpyǵanyn aıtty. Segizinshi blokta da bastapqyda shaǵyn órt shyqqanymen, órt sóndirýshiler ony der kezinde toqtatqan.
Gonkongtaǵy turǵyn úıler tyǵyz salynatyndyqtan, páterlerdiń kólemi shaǵyn, bos keńistik qalmaıdy. Mundaı josparlaý órt kezinde zardap shegetin adamdar sanyn arttyra túsedi.
О́rt sóndirý qyzmeti basshysynyń orynbasary Derek Armstrong Chan joǵary temperatýra qutqarýshylarǵa ǵımaratqa kirýge múmkindik bermeı, evakýasııany qıyndatqanyn aıtty. Onyń sózinshe, qulaǵan qurylys bólikteri men qańqalar da qutqarýshylarǵa qosymsha qaýip tóndirgen.
