Bul – bıyl Disney-diń qazaq tilinde «sóıletken» tórtinshi fılmi. Fılmderdi túrli elderge beıimdep, dýblıajdaý – Disney kompanııasynda burynnan qalyptasqan úrdis. Disney jyl saıyn ár fılmniń túrli tilderdegi 40-qa jýyq nusqasyn daıyndaıdy. «Qazaq tili» qoǵamynyń uıytqy bolýymen byltyrdan bastap iri halyqaralyq stýdııalar álemdik premeralaryn qazaq tilinde usyna bastady. Osy bastama aıasynda Disney stýdııasy 2024 jyly «Oıjumbaq 2», «Moana 2», «Mýfasa. Arystan patsha» dep atalatyn úsh fılmin qazaq tiline aýdaryp, dýblıaj jumystaryn qarjylandyrdy. Bıyl «Aqshaqar», «Lılo men Stıch», «Elıo» týyndysy usynyldy.
Kórsetilimge dýblıaj akterlarynyń tolyq quramy men tanymal tulǵalar keldi. Mýlfılmde aktrısa jáne ánshi Sabıra Jarasqyzy Djýdı Hoppstyń, teatr jáne kıno aktıory Baqytjan Álpeıis Mılton Rycevıchtyń, teatr jáne kıno aktıory Asan Májıt Bogo Basekeniń (Kapıtan Býıvolson), teatr jáne kıno aktıory Erkebulan Daıyrov Dáý Myrzanyń (Mıster Bıg) daýysyn dybystady.
«Endi «Ańdar shahary» syndy tanymal týyndynyń ekinshi bólimi qazaq tilinde kórsetiledi. Bul bizdiń mádenı keńistigimizdegi úlken ózgeristerdi kórsetetin mańyzdy oqıǵa. Álemdik deńgeıdegi kontentti qazaqsha tamashalaý qalypty ári tamasha dástúrge aınalyp keledi. Bul anımasııalyq fılm álemniń qyryqqa jýyq tiline aýdaryldy. Qazaq tili osy iri tildermen bir qatarda tur. Disney sekildi álemdik stýdııalardyń óz týyndysyn qazaqsha sóıletýi – bizdiń qoǵamnyń mádenı talǵamynyń jáne tilge degen jańa ustanymnyń nátıjesi. Dál osyndaı jobalar tilimizdiń tabıǵı ortasyn keńeıtýge zor yqpal etedi», deıdi Halyqaralyq «Qazaq tili» qoǵamynyń prezıdenti Raýan Kenjehanuly.
