Mádenıet jáne aqparat mınıstrliginiń qoldaýymen, Qazaqstandyq qoǵamdyq damý ınstıtýty uıymdastyrǵan is-sharada aldymen SARAP-tyń bıylǵy atqarǵan jumysyna qorytyndy jasalyp, QQDI-nyń Ulttyq quryltaı aıasynda ázirlegen taldaý baıandamalary, qaıyrymdylyq jáne otbasynyń jańa úlgisine qatysty áleýmettanýlyq zertteý nátıjeleri tanystyryldy.
QQDI basshysy Juldyzaı Ysqaqova «SARAP» klýby 2021 jyly qurylyp, sodan beri 62 talqylaý ótkizip, oǵan 2 500-den astam adam qatysqanyn atap ótti. Májilis depýtaty Aıdos Sarym Qazaqstan Respýblıkasy ishki saıasatynyń negizgi qaǵıdattary, qundylyqtary men baǵyttary týraly qujattyń mán-mańyzyna toqtaldy.
QQDI Otbasy jáne genderlik saıasat salasyndaǵy zertteýler ortalyǵynyń basshysy Aqnur Imanqul jańa tujyrymdamanyń basym baǵyttarynyń biri retinde jaýapty ata-ana ıdeıasyn dáripteý mindeti qoıylǵanyn erekshe atap ótti.
«Sanaly ata-ana bolý – el azamattary úshin basty qundylyqtyń biri. Zertteýge súıensek, respondentterdiń 61,4%-y ata-ana rólin ómirindegi eń basty qundylyq dep baǵalasa, 29,2%-y asa mańyzdy aspektiniń biri dep sanaıdy. Odan bólek, balalar otbasynyń basty qundylyqtary arasynda úshinshi orynda (38,7%) tur. Bul kórsetkishter ata-ana bolýdyń qoǵamda joǵary mártebege ıe ekenin jáne otbasyn qoldaýǵa baǵyttalǵan áleýmettik saıasatty odan ári damytý qajet ekenin kórsetedi», dedi spıker.
Is-shara aıasynda qaıyrymdylyq týraly da zertteý nátıjeleri jarııalandy. QQDI Áleýmettanýlyq zertteýler ortalyǵynyń sarapshysy Gúlsaıran Nurtaıdyń aıtýynsha, halyqtyń qaıyrymdylyq qorlaryna degen senim deńgeıi árkelki.
«El azamattarynyń shamamen 25%-y qaıyrymdylyq qorlaryna múldem senbeıtinin aıtqan, ıaǵnı shartty túrde ár tórtinshi azamat senimsizdik bildirdi. Qyzyǵy, qaıyrymdylyq qorlaryna shúbásiz senetinder úlesi de osy shamada – 26,4%. Al respondentterdiń 45%-dan astamy qaıyrymdylyq qorlaryna ishinara senedi, atap aıtsaq, olardyń 29,6%-y tek keıbir qaıyrymdylyq qorlaryna senim bildirse, 15,8%-y qorlarǵa emes, qaıyrymdylyqpen jeke aınalysatyndarǵa senetinin aıtqan», dedi sarapshy.
Is-shara aıasynda qatysýshylar adam quqyqtaryn qorǵaý, turmystaǵy zorlyq-zombylyqtyń aldyn alý salasyndaǵy ózekti máselelerdi de talqyǵa saldy.
