Bıylǵy oqý jyly Túrkistan oblysy úshin aıryqsha jańalyqqa toly boldy. Dál osy «Keleshek mektepteri» ulttyq jobasy aıasynda óńirde bir mezette 8 jańa mektep pen 2 jalpy orta bilim oshaǵy óz esigin aıqara ashty. Máselen, Tóle bı aýdanynyń Dostyq aýylynda 900 oryndyq, al Saıram aýdanynyń Aqsý aýylynda 600 oryndyq jańa mektepter ashyldy. Budan bólek, Shardara, Saýran, Keles, Saryaǵash, Ordabasy aýdandary men Arys qalasynda da jańa oqý oshaqtary iske qosyldy.
Bul – halyq sany qarqyndy ósip kele jatqan óńir úshin asa mańyzdy qadam. Túrkistan oblysy bilim basqarmasy basshysynyń mindetin atqarýshy Ǵalymjan Orynov ulttyq jobanyń ustazdar men oqýshylarǵa jasalǵan jaıly múmkindigin alǵa tartyp, Memleket basshysynyń bastamasynyń mańyzdylyǵyna aıryqsha toqtaldy.
“Bilim – el bolashaǵynyń altyn dińgegi. Sońǵy jyldary memleketimizde bilim berý salasyn damytýǵa aıryqsha nazar aýdarylyp keledi. Sonyń naqty aıǵaǵy – «Keleshek mektepteri» ulttyq jobasy. Bul tek ǵımarattar turǵyzý emes, eń aldymen sapaly bilim berýdiń jańa júıesin qalyptastyrýǵa baǵyttalǵan keshendi reforma.Túrkistan oblysynda bir mezette 8 jańa mekteptiń ashylýy – osy bastamanyń naqty nátıjesi. Bul – tek óńir úshin ǵana «Keleshek mektepteri» ulttyq jobasy mektep salýmen shekteletin ınfraqurylymdyq baǵdarlama emes. Bul eń aldymen qundylyqtyq turǵydan jańa bilim berý fılosofııasyn qalyptastyrýdy maqsat etetin keshendi bastama”
Joba aıasynda Túrkistan oblysynda 46 myń oqýshyǵa arnalǵan jalpy sany 29 mekteptiń qurylysy júrgizildi. Onyń 13-i ótken oqý jylynda qoldanysqa berilse, bıylǵy jańa 2025-2026 oqý jylynda 16 mektep (jobalyq qýaty - 9900) josparlandy. Bıylǵy jańa oqý jylynan beri taǵy 11 mektep ashyldy. Jyl sońynda deıin 5 keleshek mektep el ıgiligine beriledi.
Al, bala tolymdylyǵy týraly toqtalar bolsaq, 24 mekteptiń (2024 jyly paıdalanýǵa berilgen 13 mekteptiń jáne 2025-2026 oqý jylynda oqytýda bastaǵan 11 mekteptiń) bala tolymdylyǵy - 95% qurady. Búginde «Keleshek mektepterge» bala tolymdylyǵyn 100%-ǵa jetkizý baǵytynda jumystar atqarylýda.
Bul – demografııalyq ósim men ýrbanızasııa úderisterin eskere otyryp, bilim ınfraqurylymyn damytýǵa baǵyttalǵan uzaq merzimdi saıasattyń naqty nátıjesi. Sonymen qatar joba pedagog kadrlardy daıarlaý men qaıta daıarlaýǵa, sıfrlyq bilim resýrstaryn engizýge, qaýipsiz ári ınklıýzıvti bilim berý ortasyn qurýǵa jáne aýyl men qala balalaryna teń múmkindik berýge basymdyq beredi.
Búginde Túrkistan oblysy – halyq sany eń jyldam ósip kele jatqan aımaqtardyń biri. Málimetke sáıkes, qazirgi tańda 1–11 synyp aralyǵynda 500 myńnan astam oqýshy bilim alýda. Bul kórsetkish jyl saıyn shamamen 5–7 paıyzǵa artyp keledi.
Jańa mektepter salý – ýaqyt talaby. Ol mektep tapshylyǵynyń aldyn alýǵa, synyptaǵy oqýshylar sanyn azaıtýǵa, eń bastysy, bilim sapasyn arttyrýǵa múmkindik beredi.
«Keleshek mektepteri» – eldiń erteńin oılaǵan strategııalyq bastama. Onyń basty maqsaty – árbir qazaqstandyq balaǵa sapaly bilim alýǵa qolaıly jaǵdaı jasaý. Túrkistan oblysynda ashylǵan 8 jańa mektep – osy bastamanyń ómirsheńdigin dáleldeıtin naqty nátıjelerdiń biri
