Sýretti túsirgen – Erlan ALTYBAEV
Bul óńirde Mustafanyń sporttaǵy izin jalǵaǵan shákirti – Qazaqstannyń eńbek sińirgen jattyqtyrýshysy Qabıbek Muhıtov. Taekvondo tarlanynan tálim alǵan onyń kóp jyl baptaǵan shákirtteri Baýyrjan Tórebaev, Mustahım Qabdrashev, Nurhat Dúısenbaev respýblıkalyq, halyqaralyq saıystarda top jardy. Qazir olar da shákirt baptap júr.
Mustafa О́ztúriktiń Atyraýda ashylǵan taekvondo mektebinde atalǵan sporttyń qyr-syryn jetik meńgergen jergilikti taekvondoshylar Olımpııa oıyndarynda el namysyn qorǵady. Aldymen Arman Shylmanov pen Lııa Nurkına 2008 jyly Beıjiń Olımpıadasyna qatysty. Sol dúbirli dodada Arman Shylmanov qola júldeger atandy. Keıin Reseıdiń Astrahan oblysynda kindik qany tamǵanymen, munaıly shaharǵa túpkilikti qonys aýdarǵan Gúlnafıs Aıtmuhambetova atyraýlyq jattyqtyrýshylardyń tálimin alyp, London Olımpıadasynda baq synady. Budan soń Túrkııadan elimizge oralǵan taǵy bir qandasymyz Jansel Denız dál osy óńirde sheberligin shyńdap, Tokıo Olımpıadasynyń joldamasyna ıe boldy.
Atyraýlyqtar jergilikti taekvondoshylardyń osyndaı jetistigin Mustafa О́ztúriktiń atajurtqa oralýymen baılanystyrady. О́ıtkeni ol atamekennen alysta ómirge kelse de «Jan tartpaıdy, qan tartady» dep ultty, Otandy súıýdiń, qazaq rýhyn asqaqtatýdyń úlgisin kórsetti. Qazaq sportshylarynyń álemdik dodalarda top jarǵanyn, Kók baıraqtyń bıikte jelbirep, Ánuran shyrqalǵanyn qalady. Ult rýhynyń bıiktegenin armandap, ónegeli ári izgilikti isimen ańyzǵa aınalǵan arys dese jarasatyn qazaqtyń birtýar perzenti Mustafa О́ztúriktiń ómirge kelgen kúni – 23 qarasha. Dál osy osy kúni arystandaı aıbarly tulǵanyń esimi munaıly shahardyń «Balaýsa» shaǵyn aýdanyndaǵy jańa kóshege berildi.
Osyǵan oraı ótken is-sharaǵa kelbeti de, qas-qabaǵy da Mustafanyń ózinen aýmaı qalǵan qyzy Neslıhan О́ztúrik pen baýyry Omar Taıjı arnaıy keldi. Ardaqty ákesiniń meıirimdi sózin, jyly alaqanyn ańsaǵan qyzy kóshege qoıylǵan eńseli eskertkish taqtadaǵy beınesin aıalaı sıpap, erekshe tolqynysyn jasyra almady.
«Ákem kózi tirisinde óz jolynyń qansha jannyń júregine jetetinin, talaı býyndy rýhtandyratynyn bilmegen edi. О́z esimi ondaǵan jyl ótse de sheksiz mahabbatpen, maqtanyshpen, qurmetpen atalatynyn sezbedi. Ákemniń ómirge kelgen kúni Jaıyq ózeniniń jaǵasyndaǵy Atyraý qalasyna alǵash ret tabanym tıdi. Munda ákemniń usynysymen ashylǵan taekvondo mektebiniń shákirti kóp eken. Olardyń jetistiginen de habardarmyn. Jańa shaǵyn aýdandaǵy kóshege esimi berilgenine qýanyp, ári tolqyp turmyn. Bul – munaıly óńir turǵyndarynyń ákemniń rýhyna qurmeti. Eskertkish taqtadan asyl ákemniń beınesin kórip, saǵynyshym údeı tústi», deıdi Neslıhan О́ztúrik.
Baýyry Omar Taıjı da munaıly shaharǵa alǵash ret taban tiredi. Onyń aıtýynsha, Mustafa bala kezinen qazaqty álemge tanytyp, abyroıyn asqaqtatýdy kózdepti.
«Ol atamekenge oralýdy kóp jyl boıy ańsady. «Qanym atajurtqa tartyp turady. Qazaq jerine tabanym bir tıse ǵoı. Kıeli topyraǵyn basyp, aýasymen keń tynystaǵym keledi», deýshi edi. Sol armany oryndalyp, Qazaqstanda taekvondo sportynyń negizin qalady. Qazir qazaq eliniń taekvondoshylary álemdik saıystarda top jaryp júr. Bar qazaqty baýyryna basqan aǵamyzdyń esimi Atyraýdaǵy kóshege berilgeni kóńilimdi tolqytty», dedi Omar Taıjı.
Al shákirtteri taekvondo tarlanynyń adamı bolmysyna tereń boılady. Mustafa О́ztúrik shákirtterine aıtqan tárbıelik máni zor ulaǵatqa toly sózderin eske aldy. Qazaq eli, shákirtteri bar da álem tanyǵan dańqty tulǵanyń esimi umytylmaıtynyn sóz etti.
«Mustafa aǵamyzben alǵashqy kezdesýdi áli kúnge umytqan joqpyz. Ol árdaıym shákirtterine taǵylymdy áńgime aıtyp, «sheberligiń shyńdalyp, baǵyń jansa, chempıon bolý qıyn emes. Biraq ómirge adam bolyp kelgen soń aldymen adamdyq bolmysty joǵaltpaý qajet. Sportshy ataq pen dańqtyń býyna boı aldyrmaı, meıirimdi, qaıyrymdy, sońynan ergen býynǵa úlgi kórsetetin ónegeli bolýy kerek», degendi jıi aıtýshy edi. Mustafa aǵamyz – namystan jaratylǵan biregeı tulǵa», deıdi Qazaqstannyń eńbek sińirgen jattyqtyrýshysy Qabıbek Muhıtov.
Atyraý oblysy
