Memorandým aıasynda taraptar orta, tehnıkalyq jáne kásiptik bilim berý uıymdarynyń oqý úderisine ǵylymı, ınnovasııalyq jáne sıfrlyq tehnologııalardy, sondaı-aq jasandy ıntellektini engizý, STEM baǵyttaryn damytý jáne jas ǵalymdarǵa qoldaý kórsetý boıynsha birlesken jobalardy iske asyrýǵa kelisti.
– Memleket basshysynyń tapsyrmasyna oraı elimizde ǵylymdy damytýǵa aıryqsha basymdyq berilip otyr. Bul memorandým – bolashaq zııatkerlik áleýetti qalyptastyrý jolyndaǵy naqty qadam. Búginde erte jastan ǵylymǵa baýlý maqsatynda bilim uıymdarynda STEM-zerthanalar, zamanaýı pándik kabınetter men túrli sheberhanalar arqyly zertteý ınfraqurylymy qalyptastyrylady. Bıyl mektep oqýshylary 80-ge jýyq halyqaralyq jáne respýblıkalyq ǵylymı jobalar baıqaýyna qatysty. Bul bolashaq ǵalymdardy tárbıeleý baǵytyndaǵy jumystardy sapaly jalǵastyrýdyń ózektiligin kórsetedi,– dedi J. Súleımenova.
Aıta keteıik, jyl basynan beri halyqaralyq olımpıadalar men ǵylymı baıqaýlarda 1 564 oqýshy 879 júlde alsa, onyń ishinde 171 altyn, 312 kúmis, 394 qola medal ıelengen. Sondaı-aq elimizde halyqaralyq bedeldi ǵylymı jarystarda jeńiske jetken oqýshylar men olardyń pedagogterine bir rettik memlekettik syıaqy tóleý júıesi engizilip jatyr. Buǵan deıin mundaı yntalandyrý halyqaralyq pándik olımpıadalarda júldeger bolǵandarǵa berilgen edi.
Azamat QUSAIYN
