Janna Kenjına qazynaly Qarashyǵanaǵymen áıgili Bórli aýdanynyń ortalyǵy Aqsaı qalasynda týyp-ósken. Ata-anasy qarapaıym jumysshy boldy. Eńbek jolyn temirjol stansasynda poıyz dıspetcheri bolyp bastaǵan Janna es bilgeli eńbekpen shyńdalǵan jan. 2004 jyldan kásibin úzdiksiz damytyp, 2008 jyly «DSK Prıorıtet» atty JShS qurdy.
– Biz zamanaýı standartqa saı qaýipsiz, uıymdasqan eńbek ortasyn qura bildik. Sondaı-aq qyzmetkerlerdi oqytý men kásibı damýǵa erekshe mán berip kelemiz. Jumysyn jańa bastaǵan mekeme senimge ıe bolyp, tolyqqandy tapsyrys alýǵa biraz ýaqyt kerek. Alǵashqy kezde túrli mekeme aýlasyndaǵy ishki joldardy jasap júrdik. Keıin «Samal» shaǵyn aýdanyna barar joldy, Asan aýyly men Juldyz shaǵyn aýdanyna deıingi Táýelsizdik kóshesine tósep shyqtyq. Úlken jaýapkershilikpen atqarylǵandyqtan bolar, bir qabat qana asfalt tóselgen sol kóshelerge áli eshqandaı syzat túsken joq. 2011 jyly Oral qalasynyń kóp bóligin sý basqanda qazylyp qalǵan bólikteri bolmasa, jaqsy saqtaldy, – deıdi kompanııa basshysy.
Sodan beri qıyndyǵy mol, synaǵy kóp jıyrma jylǵa jýyq ýaqyt ótipti. «DSK Prıorıtet» Batys Qazaqstan oblysynda jol salatyn iri kompanııalardyń birine aınaldy. Búginge deıin kompanııa jalpy uzyndyǵy 1000 shaqyrymnan astam respýblıkalyq, oblystyq, aýyldyq mańyzy bar avtokólik joldaryn kúrdeli jóndep, salyp shyqqan. О́ńirdegi ınfraqurylymdy damytýǵa baǵyttalǵan memlekettik baǵdarlamalardy iske asyrýǵa, sondaı-aq respýblıkalyq, oblystyq, qalaishilik mańyzy bar avtokólik joldaryn salý, jóndeý jumysyna belsene qatysatyn kompanııa kásibı biliktiliginiń arqasynda jol qurylysy salasynda turaqty ári jaýapty merdiger retinde tanyldy.
Kompanııa joldar men avtomagıstraldar salyp qana qoımaı, jol-qurylys materıaldaryn óndiredi. Jol qurylysy salasynda zerthanalyq synaqtar júrgizý, arnaıy jol-qurylys tehnıkasymen qamtamasyz etý sekildi qyzmetterdi de qosa alyp júrgen úlken ujymnyń kólik parkinde qazir jol qurylysy jumysyna arnalǵan 100-den astam arnaıy tehnıka bar. Uıym óndiristik qajettilikke sáıkes tehnıkalyq parkti jyl saıyn jańartyp, tolyqtyryp otyrady.
Kompanııa osy kezge deıin «QazAvtoJol» ulttyq kompanııasynyń, «Karachaganak Petroleum Operating B.V.» alıansynyń, Batys Qazaqstan oblysy jolaýshylar kóligi men avtomobıl joldary basqarmasynyń, Oral qalasy, Báıterek, Bórli, Terekti, Tasqala aýdandary turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimderiniń tapsyrysyn oryndap, respýblıkalyq mańyzy bar «Podstepnoe – Fedorovka – Reseı shekarasy» avtomobıl jolynyń biraz bóligin qaıta jańǵyrtty. Oblystyq mańyzy bar «Tasqala – Aqqýraı – Bolashaq – Reseı shekarasy», «Aqsaı – Shyńǵyrlaý», «Terekti – Aqsaı» avtokólik joldary ortasha, kúrdeli jóndeýden ótti. Oral qalasynda, Zashaǵan, Derkól, Krýgloozernoe kentterinde kósheler qaıta jańǵyrtylyp, kúrdeli, ortasha jóndeý jumysy jasaldy. Báıterek aýdany aýyldaryna, sondaı-aq Bórli, Terekti, Tasqala aýdandarynyń eldi mekenderine kireberis joldary salyndy.
Negizinen er-azamattar qyzmet etetin úlken kompanııany basqarý áıel adamǵa qıyn emes pe? Osyndaı oı oqyrmanǵa da keletin shyǵar.
– О́zimdi bul salasyz elestete almaımyn. Jasyratyny joq, qıyn. Biraq ujymdy áıel adam basqarǵannyń artyqshylyǵy da bar. Men ár qyzmetkerdiń ishki dúnıesine úńilýge tyrysamyn. Jumysqa qulshynysyn, qabiletin baıqap júremin. Qalada, dalada jol salý – eki túrli. Oǵan qyzmetkerdi de laıyqty tańdaı bilý kerek. Ujymda kóbi er adam bolǵan soń meni qurmettep, árqashan qoldap júredi, – deıdi qaısar qyz.
Taqtaıdaı tegis jol batysqazaqstandyqtardyń baǵzydan kele jatqan bas aýrýy. О́ıtkeni óńirdegi respýblıkalyq mańyzy bar 1 349 km joldyń 17%-y, jergilikti mańyzy bar 4 834 km avtojoldyń 44%-y qalypqa saı kelmeıdi. Keıde memlekettiń mıllıardtaǵan teńgesi jumsalyp jóndelgen joldyń sapasy da syn kótermeı jatady. «Aqsaı qalasyna aıyna eki ret baratyn adam retinde aıtaıyn, 31 mlrd teńge qarajatqa «Qazkomservıs» salǵan jol men 15 mlrd teńgege «DSK Prıorıtet» salǵan joldyń aıyrmasy jer men kókteı» dep jazdy jaqynda áleýmettik jelige Oral qalalyq máslıhatynyń depýtaty Erlan Jumataev.
Janna Tájiǵulqyzy basqaratyn kompanııanyń atyna jelide aıtylǵan osyndaı jyly pikir óte kóp. Kompanııa basshysy kópshilik synyna sergek qaraıdy, únemi yqylaspen jaýap beredi. Eki uldyń anasy, shańyraqtyń uıytqysy bolyp otyrǵan jannyń taýsylmas ishki qýaty tańǵaldyrady. Ol Isker áıelder qaýymdastyǵynyń belsendi múshesi, 2018 jyldan beri «Amanat» partııasynyń qatarynda. VII shaqyrylǵan Oral qalalyq máslıhatynyń depýtaty. El Táýelsizdiginiń 30 jyldyǵy qarsańynda Janna Kenjına «Eren eńbegi úshin» medalimen marapattaldy. Oblys kóleminde qaıyrymdylyq qyzmetiniń damýyna erekshe úles qosqany úshin «Jomart júrek» syılyǵyna ıe boldy. Jalpy, «DSK Prıorıtet» kompanııasy bilim, mádenıet, sport salasy, abattandyrý jumysyna turaqty qoldaý kórsetedi. Tek 2024–2025 jyldary ǵana kompanııa qaıyrymdylyq sharalary, áleýmettik jobalarǵa 50 mln teńgeden astam qarjy bóldi.
«Qurylysshy – eń beıbit mamandyq» degen sóz bar halyqta. Onyń ústine qurylysshy ana, názik jandy áıel bolsa, bul kásiptiń qadiri bıikteı túsetin sııaqty. Ádette áıel jany ádemilikke jaqyn, úılesimdi qalaıdy, mahabbat-meıirimge mol bolady. Jannanyń únemi eldiń sharýasynda júretini, tynym tappaıtyny, sonyń ishinde qurylys salasyndaǵy túrli túıtkildi talmaı aıtyp, másele kóteretini – týabitti minezinen. Batys Qazaqstan oblysynyń, Oral qalasynyń qoǵamdyq-saıası, áleýmettik-ekonomıkalyq tynys-tirshiliginde keıipkerimizdiń aıqyn qoltańbasy bar.
Batys Qazaqstan oblysy
