Foto: Ashyq derekkóz
Qaraǵandy oblysynyń Medısınalyq jáne farmasevtıkalyq baqylaý departamenti aımaqta dári-dármekpen qamtamasyz etý jaǵdaıy turaqty ekenin málimdedi. JRVI men tumaýdy emdeýge arnalǵan negizgi preparat toptaryna júrgizilgen monıtorıng nátıjesi dárihanalarda tapshylyqtyń baıqalmaıtynyn kórsetken. Mamandardyń aıtýynsha, turǵyndar tarapynan suranystyń kúrt ósýi de tirkelmegen.
Departament derekterine súıensek, Qaraǵandy, Temirtaý, Balqash qalalaryndaǵy dárihana jelilerinde vırýsqa qarsy preparattar, eresekter men balalarǵa arnalǵan qyzý túsiretin dáriler, sondaı-aq sımptomatıkalyq emge qoldanylatyn quraldardyń tolyq spektri bar.
«Vırýsqa qarsy negizgi preparattar, parasetamol jáne ıbýprofen negizindegi dáriler barlyq dárihanalarda jetkilikti. Qoımalardaǵy jaǵdaı turaqty, tapshylyq joq», dep málimdedi vedomstvo mamandary.
Iri dıstrıbıýtorlarmen dári jetkizý máseleleri aldyn ala kelisildi, al dárihana jelilerin tolyqtyrý josparly túrde jalǵasyp jatyr. Departament jeke preparattardyń qysqa ýaqytqa qoljetimsiz bolýy logıstıkalyq sebepterge, jóneltý nemese qabyldaý merzimderine baılanysty ekenin túsindirdi.
Sonymen qatar, turǵyndarǵa dárihanalarda suranysqa ıe preparattardyń qoljetimdi balamalary bar ekeni eskertiledi. Dári tańdaǵanda belsendi zatqa nazar aýdarǵan jón, qajet bolsa farmasevt keńesine júginýge bolady.
Mınıstrliktiń dárilik qoljetimdilikti arttyrý saıasatynyń nátıjesinde keıbir preparattardyń baǵasy tómendep keledi. Mysaly, Sýmamed pen Sıprolet sııaqty bakterııaǵa qarsy dáriler burynǵyǵa qaraǵanda qoljetimdirek. Al reseptsiz satylatyn preparattar – parasetamol, ıbýprofen jáne basqalardyń baǵasy ár dárihanada ártúrli bolýy múmkin. Bul baǵa naryǵynyń erkin qalyptasýy men dárihana uıymdarynyń jeke baǵa saıasatyna baılanysty.
