Foto: reuters.com
56 jastaǵy Býshbı saparyn Chılıden bastaǵanyn jáne Latyn Amerıkasy arqyly ótken jyldarynda janynda tek arzan Instamatic fotoapparaty men 35 mm plenka bolǵanyn eske aldy. Sol kezde medıa nazaryn oılaýǵa da murshasy bolmaǵan.
Ol úshin bastysy – Panama men Kolýmbııa arasyndaǵy qaýipti Daren ótkelin kesip ótpesten buryn aman qalý, azyq tabý edi.
«Ol kezde álem múldem basqa edi, áleýmettik jeli degen joq bolatyn. Sondyqtan saparymdy vıdeoǵa túsirýdiń qajeti bolmady. TikTok-qa bıyl ǵana keldim. Bul men úshin úırenshikti emes. Sebebi kenetten seni kóp adam baqylap otyrady, jasyryna almaısyń. Biraq, áleýmettik jeliniń úlken qural ekenin túsindim», deıdi Karl Býshbı Reuters agenttigine.
Álemdi jaıaý saıahattaý
Býshbı óziniń osy «Goliath Expedition» atty álemdik saparynda motorly kólikti múlde qoldanbaýǵa ant bergen. 2006 jyly ol Berıng buǵazyn Alıaskadan Reseıge jaıaý kesip ótse, 2024 jyly Kaspıı teńizin júzip ótken.
Alǵashqy jospary boıynsha 36 myń mıldik joldy 8 jylda aıaqtaýy kerek bolǵan. Biraq 2008 jylǵy qarjy daǵdarysy, COVID-19 pandemııasy, geosaıası ózgerister men vızalyq kedergilerge baılanysty onyń sapardy aıaqtaý ýaqyty uzarǵan.
«Men qarjy daǵdarystaryn, soǵystardy, pandemııalardy bastan ótkerdim. Olardyń barlyǵy saparǵa qatty áser etti. Biraq alǵa jyljı berdim», deıdi ol.
Jıhankez úıine 2026 jyldyń qyrkúıek-qazan aılarynda jetýdi josparlap otyr.
Eń qıyny – psıhologııalyq tózim
Býshbı batpaqty velojolmen arbasyn ıtere júrip, keı mezetterde psıhologııalyq aýyrlyqqa tózý qıyn bolǵanyn aıtty.
«Shól dalada aptalar boıy landshaft ózgermeıdi. Sol mıyńdy sharshatady. Arktıkada da solaı – ol jer seni únemi óltirgisi keletindeı seziledi», deıdi Karl Býshbı.
Jıhankez sapary aıaqtalǵannan keıin birden jańa, kúrdeli isti bastaıtynyn aıtady.
