Foto: Aqorda
«2021 jyldan beri aýyl halqyna alǵashqy medısınalyq-sanıtarlyq kómek kórsetetin 864 nysan salyndy. Sondaı-aq 388 jańa mektep ashyldy. Byltyr 2 myńǵa jýyq aýyl mektebine sapaly ınternet berildi.
Jyl ótken saıyn aýyldyń áleýeti artyp keledi. О́zin-ózi qamtamasyz etý deńgeıi joǵary aýyldardyń sany kóbeıe tústi. Aýyl sharýashylyǵynyń jalpy ónimi alty jylda 1,5 eseden astam ósip, 8,3 trıllıon teńgege jetti.
Bıyl aýyldaǵy sharýalarǵa 1 trıllıon teńge kóleminde qoldaý kórsettik. Dál osyndaı memlekettik qoldaý kórsetken elder kóp emes, tipti, bul kóptegen el qol jetkize almaıtyn qarjylaı kómek deýge bolady», dedi Memleket basshysy.
Prezıdenttiń aıtýynsha, aýyldaǵy jaǵdaıdy áli de jaqsartý qajet.
«Alaıda aldymyzda bıik maqsattar tur: biz aýyldaǵy jaǵdaıdy jaqsartyp, jumysty kúsheıtýimiz kerek.
Qazirgi aýyl ákimderiniń 60%-ǵa jýyǵy osy qyzmetke alǵash ret saılandy. Bul – jergilikti bılik quramy birshama jańardy degen sóz. Alaıda saılaýda jeńiske jetý – aldaǵy úlken jumystyń basy ǵana», dedi Qasym-Jomart Toqaev.
Memleket basshysynyń sózinshe, aýyl ákimderi mindetti túrde bilikti maman bolýǵa tıis.
«Ákim boldym, toldym» dep otyrýǵa bolmaıtyny túsinikti. Ákimder ózderiniń myqty basshy ekenin is júzinde dáleldeýi kerek. «Basshynyń baǵy – el-jurttyń qamy» dep beker aıtylmaǵan. Naǵyz elge syıly ákim bolý úshin aýyldyń ahýalyn jaqsy bilý de azdyq etedi. Halyqtyń senimin aqtap, eldiń bereke-birligin nyǵaıtý úshin jumys isteý kerek.
Ákim memlekettik deńgeıde jasalyp jatqan ózgeristerdi jergilikti jerde júzege asyrýǵa qabiletti bolýy qajet. Kásibı turǵydan bilikti ári eńbekqor ákim saılaýshylardyń senimin aqtaı alady. Sondyqtan aýyl ákimderiniń basqarý isindegi sheberligin arttyrý óte mańyzdy», dedi Prezıdent.
Qasym-Jomart Toqaev «Ákimder mektebi» jobasyna da toqtaldy.
«Ákimderdiń arasynda buryn bılik júıesinde jumys istemegen azamattar bar ekenin aıttyq. Olardyń tájirıbesi az ekeni túsinikti. Osy baǵytta «Amanat» partııasynyń bastamasymen «Ákimder mektebi» jobasy qolǵa alyndy. Árıne, mundaı kýrstar joǵary bilimniń ornyn basa almaıdy. Sondyqtan ýnıversıtetterde oqytylatyn «Memlekettik jáne jergilikti basqarý» baǵdarlamasyn talapqa saı ózgertý kerek.
Aýyl-aımaqtardy basqarý, kóshbasshylyq qabiletti damytý máselesi nazardan tys qalǵan. Al bul jumyspen eń aldymen Memlekettik qyzmet isteri agenttigi shuǵyldanýy kerek. Quzyrly mınıstrlikpen birlesip, aýyl ákimderin daıarlaýǵa belsendi túrde kirisý qajet», dedi Memleket basshysy.
