Qazaq tilindegi tuńǵysh jınaqqa koreı ádebıetiniń klassık jazýshylary I Hıo Soktyń «Qaraqumyq gúldegen kezde», Hıon Djın Gonnyń «Sátti kún» jáne «Týǵan jer» , Kım Iý Djongtyń «Bom Bom» jáne «Kamelııa gúli», Hvan Sýn Vonnyń «Nóser jańbyr» atty shyǵarmalary engen.
Bul bastama Koreıa Respýblıkasynyń Kórkem aýdarma akademııasy usynǵan «Sheteldik ýnıversıtetterdegi koreıtaný bólimine arnalǵan kórkem aýdarma semınary» baǵdarlamasy aıasynda júzege asty. Kitaptyń jaryq kórýine ál-Farabı atyndaǵy Qazaq ulttyq ýnıversıteti, Shyǵystaný fakýltetiniń Qıyr Shyǵys kafedrasy úlken eńbek sińirdi.
2025 jyldyń 8 qazanynda Koreıa Respýblıkasynyń Almaty qalasyna jańadan taǵaıyndalǵan Bas konsýly Ha Te Ýk myrza ál-Farabı atyndaǵy QazUÝ-de bolyp, koreıtaný bóliminiń stýdentterine arnaıy dáris oqyǵan edi. Osy kezdesýde Bas konsýl kafedra júzege asyryp jatqan halyqaralyq jobalarmen tanysyp, eki el arasyndaǵy mańyzdy bastamalarǵa qyzyǵýshylyq tanytyp, kafedra qolǵa alyp otyrǵan aýdarma jınaǵynyń jaryqqa shyǵýyna, tusaýkeserin ótkizýge qoldaý kórsetýge nıet bildirgen edi.
Osydan keıin Qıyr Shyǵys kafedrasynyń meńgerýshisi Aqerke Abaǵan, kafedra dosenti Aıgerim Belıalova men aǵa oqytýshy Áıgerim Saılaýkenova jetekshilik etken aýdarmashylar toby jınaqtyń kórneki bezendirilýine qatysty Bas konsýldyqtan qoldaý surap, ózara mádenı, ádebı baılanysta anımasııalyq fılmderdiń mańyzy úlken ekendigi jetkizgen.
Qos taraptyń túsinistik taýyp, birin biri qoldaýynyń arqasynda Koreıanyń tanymal anımasııalyq rejısseri An Dje Hýn myrza óz týyndylaryn jınaqta aqysyz paıdalanýǵa resmı túrde ruqsat beredi. Nátıjesinde QazUÝ-dyń koreıtaný bóliminiń 4-kýrs stýdentteri rejısserdiń úsh anımasııalyq fılmine qazaq tilinde sýbtıtr ázirledi.
Aýdarma kitaptyń tusaýkeserinde An Dje Hýn myrzanyń alǵash ret qazaq sýbtıtrleri qoıylǵan «Qaraqumyq gúldegen kezde», «Sátti kún» jáne «Bom Bom» atty annımasııalyq fılmderi Abylaı han atyndaǵy Qazaq halyqaralyq qatynastar jáne álem tilderi ýnıversıteti, ál-Farabı atyndaǵy Qazaq Ulttyq Ýnıversıtetiniń koreıtaný bólimi stýdentteri men oqytýshylarynyń nazaryna usynyldy.
Tusaýkeserden keıin «Book Talk» formatyndaǵy ádebı suhbat ótip, Aqerke Abaǵan men Áıgerim Saılaýkenovaǵa, sýbtıtr ázirleýge qatysqan stýdentter Abaı Tomırıs pen Albına Ýahıtovaǵa, sondaı-aq rejısser An Dje Hýn myrzaǵa ádebıettegi ádemi jańalyqqa aınalǵan aýdarma jınaǵyna qatysty suraqtar qoıyldy.
Almaty
