Fotolar: atameken.kz
Baıqaý kópshiliktiń erekshe qyzyǵýshylyǵyn oıatty: jalpy 1100 adam tirkelip, olardyń 330-y aldyn ala irikteýden ótti, 80 qatysýshy anketa tapsyrdy, al fınalǵa 33 úzdik kásipker joldama aldy. Olar – elimizdiń túrli óńirlerinen kelip, franchaızıng arqyly óz bıznesin keńeıtýdi maqsat etken kásipkerler.
OAFQ tóraıymy Gúlbaný Maıǵarına qatysýshylardy quttyqtap, konkýrstyń franchaızıng pen jalpy kásipkerlikti damytýdaǵy mańyzdy rólin atap ótti:
«KazBrand – jaı ǵana baıqaý emes. Bul – ıdeıasyna senetin, jańa dúnıe jasaıtyn jáne bıznestiń erejesin qaıta jazatyn adamdardyń joly. Búgin munda qazaqstandyq bıznestiń bolashaǵyn quratyn – batyl, júıeli, tanymal bolýǵa umtylǵan jandar jınaldy» dedi G.Maıǵarına.
Ol búginde Qazaqstanda 2,3 mıllıonnan astam shaǵyn jáne orta bıznes sýbektileri bar ekenin, al 30 myńǵa jýyq kompanııanyń franshıza boıynsha jumys isteıtinin tilge tıek etti.
G.Maıǵarınanyń aıtýynsha, franchaızıng – kásipkerlerge jyldam ári senimdi túrde damýǵa múmkindik beretin tıimdi jol.
«Baıqaýdyń 4 jeńimpazyna quny 7 mıllıon teńgeden bastalatyn franshıza paketi, 1 jyldyq súıemeldeý, damý strategııasy, franshızany satýdaǵy kómek, marketıngtik jáne zańgerlik qoldaý usynylady», dedi ol.
Qazylar quramyna belgili kásipkerler, salalyq sarapshylar, depýtattar jáne memlekettik organdardyń ókilderi endi. Al qazylar alqasyna «Atameken» UKP basqarma tóraǵasynyń orynbasary Tımýr Jarkenov tóraǵalyq etti.
Joba seriktesteri de baıqaýdy qoldap, KazBrand jańa ulttyq brendterdiń bastaý alatyn alańyna aınalatynyna senim bildirdi.
«KazBrand realıtı-baıqaýynyń fınaly – Memleket basshysy atap ótken basymdyqtardyń naqty kórinisi: kásipkerlikti damytý, sıfrlandyrý jáne ulttyq brendterdiń ósýi. Eń myqtylar jeńiske jetsin!», dedi «Atameken» UKP basqarma tóraǵasynyń orynbasary Tımýr Jarkenov.
«Respublica» partııasynan Májilis depýtaty Aıtýar Qoshmambetov joba týraly pikirin bildirdi.
«KazBrand sııaqty aýqymdy jobany jasaý jáne ótkizý – úlken jaýapkershilik. Munyń artynda qyrýar eńbek, otandyq kásipkerlerge degen senim jáne árbir azamatqa ózin kórsetýge múmkindik berý nıeti tur. Mundaı bastamalar – erkin oılaıtyn, jaýapkershiligi joǵary ári jasampaz jańa otandyq bıznestiń qalyptasýyna jol ashady», dedi depýtat.
Fınalıster óz jobalaryn óndiris, rıteıl, qyzmet kórsetý jáne qoǵamdyq tamaqtaný baǵyttary boıynsha tanystyrdy. Ár kásipker óz bıznes-modelin usynyp, qazylar suraqtaryna jaýap berdi jáne kásibı baǵalaryn aldy.
Qazylar alqasynyń sheshimimen jeńimpazdardyń esimderi belgili boldy:
Tasqyn Myrza, MYRZA BRAND (О́ndiris sanaty);
Qorzhyn (Rıteıl);
Ádilet Serikuly, SHOQ WEST (Qoǵamdyq tamaqtaný);
Ekaterına Gerasımova, «Detskıe sady Zaıka» (Qyzmet kórsetý).
Olar tolyq daıyn franshıza ázirleý qyzmetin jáne KazBrand komandasynyń bir jyldyq súıemeldeýin jeńip aldy. Al arnaıy nomınasııalardyń laýreattary Ortalyq Azııa Franchaızıng qaýymdastyǵyna tegin múshe bolý múmkindigine ıe boldy.
Arnaıy nomınasııa ıegerleri: «Úzdik ıdeıa» – Evgenıı Voronın (MagicStick elektroepılıasııa stýdııasy); «Úzdik ónim» – Baǵlan Ankaýov (Arlan Design kompanııasy); «Úzdik prezentasııa» – Rada Aýbakırova (Qasietti shyǵarmashylyq ortalyǵy) jáne Álıhan Rahmet (PIZZA 500 TENGE).
Jabylý rásiminde Gúlbaný Maıǵarına qatysýshylar men seriktesterge alǵysyn bildirdi:
«KazBrand – shynaıy yntasymen jasalǵan brendter dúnıege keletin biregeı alań. О́z ıdeıasyna senetin, árdaıym alǵa umtylatyn jáne aınalasyna shabyt syılaıtyn ár adamǵa rahmet aıtamyn. Sizderdiń eńbekterińiz Qazaqstandy jarqyn ári qýatty etedi. Seriktesterimizge alǵys bildiremin! Barshańyzǵa tabys, jańa jetistik jáne sáttilik tileımin!», dedi ol.
Is-sharaǵa qatysýshylar men qonaqtar KazBrand realıtı-baıqaýyn elimizdegi úzdik bıznes-ıdeıalarmen tanysýǵa, tájirıbe bólisýge jáne jańa múmkindikterge jol ashatyn biregeı platforma retinde baǵalady. Baıqaýdyń fınaly eldegi kásipkerliktiń damýyna degen senim, jasampazdyq jáne jańashyldyq rýhyn biriktirgen mańyzdy oqıǵa boldy.
