Dáristiń álqıssasynda aıtylǵandaı, jıyn «Taza Qazaqstan» ekologııalyq aksııasy aıasynda ótip jatqan kezekti is-sharanyń biri edi. Negizgi dittegen maqsat – keleshek jastarǵa qorshaǵan ortany qorǵaý, ony únemi taza ustap, uqypty qaraý tárizdi qarapaıym qaǵıdaǵa arnalǵan. Biraq jastardy da, tipti bizdi de qyzyqtyryp qoıǵany – lektordyń «búgin biz orman dúnıesiniń qyr-syryn aıtamyz» degeni-tuǵyn.
Áýeli «Semeı ormany» tabıǵı rezervatynyń mamandary stýdentterge orman alqaptaryn saqtaý, órtten qorǵaý ıakı qalpyna keltirý, qaýipterdiń aldyn alý jóninde jan-jaqty túsindirme berdi. Dáriste qorshaǵan ortany qorǵaýdyń zamanaýı jańa tásilderi, orman ekojúıesin qalpyna keltirýdiń ǵylymı jetistikterin, sondaı-aq tabıǵatqa jaýapkershilikpen qaraýdyń tájirıbeleri aıtyldy. Erkin formatta ótken dáriste mamandar stýdentterdiń de suraqtaryna irkilissiz jaýap berip, orman sharýashylyǵyndaǵy kásibı qyzmettiń qyr-syryn ashyp kórsetti.
О́z kezeginde «Semeı ormany» tabıǵı rezervatynyń orman ósirý ınjeneri Aıdana Sabyrjan óńirdegi ekologııalyq bastamalar týraly aıtyp berdi. Stýdentter úshin mamandardan tikeleı aqparat alý úlken tájirıbe boldy. Olar orman sharýashylyǵynda qyzmet etýdiń erekshelikteri, ekologııalyq qaýipterdiń aldyn alý is-qımyldary jáne tabıǵatty qalpyna keltirý jumystary jóninde suraqtaryna jaýap aldy.
«Orman sheberi» mamandyǵynda bilim alyp jatqan stýdent Aqerke Talǵat dáristiń stýdentter úshin asa mańyzdy bolǵanyn aıtty.
«Ekologııany tek kitaptan oqý basqa, al ony kúndelikti qorǵap júrgen mamandardan tyńdaý múldem bólek deńgeı. Osyndaı is-sharalardy jıi ótkizip turǵan jón, sebebi bul ormannyń «densaýlyǵy» men sanıtarlyq jaǵdaıyn jaqsartýǵa yqpal etedi. Búgin kóshet otyrǵyzý kórsetkishteriniń ósip jatqanyn bildim. Bolashaqta osy salada ózimdi synap kórgim keledi. Ekologııaǵa óz úlesimdi qosa alamyn dep senemin», dedi Aqerke Talǵat.
Kolledj ben «Semeı ormany» rezervaty arasyndaǵy seriktestik aıasynda aldaǵy ýaqytta da ekologııalyq baǵyttaǵy leksııalar, praktıkalyq kezdesýler jáne stýdentterdiń tabıǵat qorǵaý is-sharalaryna qatysý múmkindikteri qarastyrylmaq.
Is-shara uıymdastyrýshylarynyń aıtýynsha, mundaı kezdesýler jastardyń tabıǵatqa sanaly kózqarasyn qalyptastyrýǵa jáne «Taza Qazaqstan» baǵdarlamasynyń óńirde tıimdi júzege asýyna óz úlesin qospaq. Jıyn sońynda mamandardan «Semeı ormany» rezervatynda atqarylyp jatqan jumystardyń jaı-japsaryn surap kórdik.
«Semeı ormany» rezervatynda «Taza Qazaqstan» aksııasy óte úlken aýmaqta ári keshendi túrde júrgiziledi. Joǵaryda aıtylǵandaı, biz tıisti mekemelermen birlese otyryp, kóshet otyrǵyzý, qustarǵa uıa salý, aýmaqtardy qoqystan tazartý sııaqty ekologııalyq jumystardy atqaryp kelemiz. Bıyl «Semeı ormany» aýmaǵynda kóshet otyrǵyzý jumystary keń kólemde júrgizildi. Kóktemde qaraǵaı kósheti otyrǵyzǵan, jalpy 4 810 gektar alqap qamtyldy. Kúzgi maýsymda 475 gektar aýmaqqa jabyq tamyrly kóshet otyrǵyzyldy. Jalpy eseppen alǵanda, bir jyl ishinde 2 mıllıonnan astam kóshet otyrǵyzyldy. «Semeı ormany» rezervatynyń basty mindetteriniń biri – Memleket basshysynyń Abaı oblysynda 2021–2027 jyldar aralyǵynda 2 mlrd kóshet otyrǵyzý jónindegi tapsyrmasyn júıeli túrde oryndaý. Osy baǵytta úzdiksiz jumys atqarylyp keledi. Búginde rezervat aýmaǵynda 21 myń gektardan astam jerge 100 mıllıonnan artyq kóshet otyrǵyzyldy. Sondyqtan «Taza Qazaqstan» tek bir rettik aksııa emes, bul – ár azamattyń tabıǵatqa degen jaýapkershiligin kúsheıtýge baǵyttalǵan uzaqmerzimdi mádenı qalyp. Orman – bizdiń ortaq baılyǵymyz, sondyqtan ony qorǵaý ár býynnyń mindeti», dedi Aıdana Sabyrjan.
Abaı oblysy
