Túrkistan oblysy ákimdiginiń qoldaýymen, «Farab» ǵylymı ámbebap kitaphanasy, «Medıakratııa» qoǵamdyq birlestigi jáne «Marhabat» jýrnalynyń uıymdastyrýymen ótken basqosýǵa qalamgerler, qoǵam qaıratkerleri men jastar, jazýshynyń jaqyn týystary qatysty. «Maqamy bólek Marhabat» atty jınaqqa engizilgen estelikter, ǵylymı maqalalar men tolǵanystar klassık jazýshynyń shyǵarmashylyq erekshelikterimen birge adamı bolmysyn jan-jaqty asha túsken. Qazaq ádebıetinde ózindik orny bar kórnekti qalamger Marhabat Baıǵut osydan úsh jyl buryn 26 qarashada pánı dúnıeden ótken edi. Jıynda jazýshynyń aıaýly jary Qyzdarkúl Pernebaıqyzy, inisi Nyshan Baıǵutov, uly Nurlan júrekjardy lebizderin bildirdi. Qalamgerler atynan Seıdolla Sadyqov, Ashan Maılybaeva, Roza Narymbetova saǵynyshty syrǵa toly estelikter aıtty. «Miras» qoǵamdyq keńesiniń tóraǵasy Halıma Jantóreqyzy, osy keńestiń múshesi, áıgili aıtysker aqyn, «Altyn dombyra» ıegeri Bekarys Shoıbekov te oqyrmanǵa oı tastar pikirlerin ortaǵa saldy. Oblystyq mádenıet basqarmasynyń basshysy Ázimhan Qoılybaev jazýshynyń murasyn dáripteýdiń mańyzyna toqtaldy. «Marhabat» jýrnalynyń bas redaktory, respýblıkalyq jazba aqyndar baıqaýynda top jaryp júrgen, bolashaǵynan úlken úmit kúttiretin jas talantty aqyn, Marhabat Baıǵut atyndaǵy syılyqtyń laýreaty Sezim Mergenbaı jazýshyǵa arnaǵan jyryn oqydy.
Tek qazaq eli emes, kúlli túrki álemine keńinen tanylǵan, myqtylyǵy moıyndalǵan kemeńger tulǵanyń shyǵarmalary álem elderi tiline aýdarylǵan. Áli de aýdaryla bermek. Máselen, aldaǵy aptada О́zbekstan astanasy Tashkent qalasynda ózbek tilindegi aýdarmasynyń kezekti tusaýkeseri bolady. Kezekti dep otyrǵanymyz Marhabat Baıǵuttyń týyndylary buǵan deıin de ózbekshege aýdarylǵan bolatyn. Jıyn barysynda «Medıakratııa» qoǵamdyq birlestiginiń Alǵyshaty «Marhabat Baıǵuttyń týǵanyna 80 jyl» jobasy aıasyndaǵy birqatar is-sharanyń joǵary deńgeıde ótýine atsalysqan «Farab» ǵylymı ámbebap kitaphanasynyń dırektory Janat Shardarbekovaǵa tapsyryldy.
Aıta ketelik, «Marhabat Baıǵuttyń týǵanyna 80 jyl» jobasy aıasyndaǵy mazmundy ári maǵynaly is-sharalar jyl boıy atqaryldy. Áýeli «Marhabat» jýrnalynyń aqparat aıdynyna jelken kerip shyǵýyna baılanysty qańtar aıynda Shymkenttegi Ál-Farabı atyndaǵy kitaphanada zııaly qaýymǵa tanystyryldy. Kóktemde «Maqamy bólek Marhabat» atty halyqaralyq sımpozıým ótti. Túrkııa, О́zbekstan, Qyrǵyzstannan jáne Qazaqstan Jazýshylar odaǵynyń basshylyq quramy, aıtýly qalamgerler, memleket jáne qoǵam qaıratkerleri, Parlament depýtattary, aqparat quraldarynyń jetekshileri, ǵalymdar, ádebıet synshylary qatysqan alqaly jıyn túńligi aldymen Túrkistanda túrildi. Erteńine Shymkentte halyqaralyq jıyn jalǵasyn tapty. Úshinshi kúni aýqymdy is-shara jazýshynyń týǵan jeri – Túlkibas aýdanynda «Taýpisteli taǵlymy» forýmynyń tórtinshi márte uıymdastyrylýyna ulasty. Oblys kóleminde «Marhabat oqýlary» shyǵarmashylyq baıqaýy birneshe aıǵa sozylyp, óte tartysty ótti. Oǵan 720 talapkerdiń qatysýy biraz jaıtty ańǵartady. Al klassıktiń pýblısıstıkasy men prozasyn taldap, tarazylaǵan jastar, stýdentter arasyndaǵy baıqaýda elimizdiń 7 óńirinen úmitkerler baq synady. Baıqaýlardyń júldegerleri sımpozıýmda marapattaldy. Jazýshy Nurǵalı Orazdyń Marhabat Baıǵut ómirin órnektegen dramatýrgııalyq shyǵarmasynyń úzindisi sol halyqaralyq sımpozıýmda qoıyldy. Keler jyly Túrkistandaǵy teatrda tolyq nusqasy sahnalanyp, qalyń kórermenge usynylmaq.
Marhabat Baıǵuttyń 80 jyldyq mereıtoıyna oraı ótkizilgen is-sharalardyń qorytyndysy ispetti ótken bul jıynda jazýshy eńbegin dáripteý, jan-jaqty nasıhattaý aldaǵy ýaqytta da turaqty túrde jalǵasatyny aıtyldy. Ásirese Ońtústikte Marhabat Baıǵut atyndaǵy Ádebıetshiler úıin ashý – kóptiń qalaýy. Qarapaıym oqyrmannan bastap elimizdegi, túrki dúnıesindegi Jazýshylar odaǵy basshylyǵy, qalam ustaǵan qaýym osy oryndy usynysty biraýyzdan qoldap otyr.
Túrkistan oblysy
