Petropavlda Naýryz meıramy ulttyq naqyshta atap ótildi

PETROPAVL. 22 naýryz. Shyǵys halyqtarynyń jańa jyly–áz Naýryz shyn mánindegi halyqtyq merekege aınalyp, ulttyq salt-dástúrler men ádet-ǵuryptar molynan kórinis tapty. Bul týraly egemen tilshisi habarlady. Naýryz merekesi «Dostyq» alańynan bastaldy. Qalalyqtardy kóktemniń janǵa jylylyq darytatyn, shýaq syılaıtyn meırammen  aımaq basshysy Erik Sultanov quttyqtady. Ortalyq alańǵa  Qazaqstan halqynyń  tatýlyǵyn, birligin beıneleıtin 100 myń  jaryqdıodty shamnan quralǵan shańyraq ornatylyp,  7 kıiz úıden turatyn etnoaýyl tigildi.  Jastar altybaqan teýip, sport jarystaryn , shoý baǵdarlamalardy qyzyqtasa,  úlkender jaǵy túrli  salt-dástúrler men «Qosh keldiń, nurly Naýryz» atty  teatrlandyrylǵan kórinisterdi tamashalady.  Bul kúni  2500  kılo palaý,  500 lıtrdeı naýryz kóje,  700 kılodan astam baýyrsaq pisirilip, jurtshylyqqa tegin usynyldy. Qazaqsha kúresten 35 balýan kúsh synasyp, «túıe balýan» atanǵan Aıbek Qyryqbaıǵa  aq qoshqar  syılandy.  Kıiz úı  baıqaýynda Aıyrtaý aýdany  Gran-prıdi utyp aldy.  Birinshi oryndy  Ǵ. Músirepov,  Taıynsha aýdandary men oblystyq ishki ister departamenti bólisti.  Aqyndar saıysynda bas júlde  shalaqyndyq Jarqyn Juparhanǵa buıyrdy. Mamlıýt aýdany tatar halqynyń ulttyq taǵamy- uzyndyǵy 3 metr bálish daıyndap ákelip, balalarǵa úlestirdi. Eki jastaǵy Ámirhan Dosaevtyń tusaýy kesilip, syılyq tartý etildi. «Sheberler aýyly» sándik-qoldanbaly shyǵarmashylyq buıymdardyń kórme-satylymy, «Shash–qyzdyń ajary» , «Paı-paı qazaqtyń kelinderi-aı» konkýrstary uıymdastyryldy. 200 adam «Qarajorǵa» bıin oryndap,  mereke ajaryn asha tústi. M. Jumabaev kóshelerinde aq jumyrtqadaı  qaz-qatar ornalasqan 13 kıiz úıdiń esikteri aıqara ashylyp,  soǵys jáne eńbek ardagerlerine, jetim balalarǵa, turmysy tómen otbasylarǵa, kemtar jandarǵa  arnap dastarhan  jaıyldy. Naýryz toıy erteń de jalǵasady. О́mir Esqalı. Derek: egemen.kz Sýret: egemen.kz