Bul Qazaqstannyń memlekettik sektordaǵy kadrlyq prosesterdi sıfrlandyrý jetistikteri halyqaralyq deńgeıde moıyndalyp jatqandyǵynyń kórsetkishi.
e-Qyzmet júıesi – memlekettik basqarýdy sıfrlyq jańǵyrtýdyń negizgi elementi jáne ulttyq kadr saıasatyn iske asyrýdyń mańyzdy quraly. Júıe HR-prosesterdi tolyq avtomattandyryp, kadrlyq derekterdi ortalyqtandyrady. Bıýrokratııalyq kedergilerdi joıyp, sýbektıvti sheshimder qabyldaý táýekelin barynsha azaıtady. Kadrlardy qabyldaý, tıimdilikti baǵalaý ári mansaptyq ilgeriletý úrdisteriniń merıtokratııalyq qaǵıdattarmen júzege asýyn qamtamasyz etedi.
Platforma barlyq memlekettik organdardaǵy 400-den astam basqarýshylyq prosesterdi jáne HR-rásimderdi qamtıdy. e-Qyzmet irikteý rásimderin sıfrlandyrý men ákimshilik kedergilerdi azaıtý esebinen kadrlyq júıeniń ashyqtyǵy men qoljetimdiligin arttyryp, kásibı jáne turaqty memlekettik qyzmetti qalyptastyrýǵa yqpal etti.
«e-Qyzmet júıesi týraly materıaldyń OPSI platformasynda jarııalanýy – Qazaqstannyń memlekettik qyzmetterdi sıfrlandyrý jáne HR-áleýetin damytý salasyndaǵy halyqaralyq jetistigi. Bul Qazaqstan tájirıbesiniń tek el ishinde ǵana emes, jahandyq deńgeıde de qyzyǵýshylyq týdyryp otyrǵanynyń aıqyn dáleli. Mundaı qadam Memleket basshysynyń «Biz úırenetin ǵana emes, úıretetin ult bolýymyz kerek» degen ustanymyna sáıkes keledi», dedi Memlekettik qyzmet isteri agenttiginiń Tóraǵasy Darhan Jazyqbaı.
e-Qyzmet júıesine 2022-2023 jyldary jańǵyrtý men sıfrlyq irikteý tetikterin engizý arqyly bir bos orynǵa orta eseppen 5,5 úmitkerden kelip, kandıdattar arasyndaǵy básekelestik aıtarlyqtaı artyp otyr. Bul dástúrli júıemen salystyrǵanda úsh eseden joǵary kórsetkish.
Aıta ketý kerek, Qazaqstannyń sıfrlandyrý salasyndaǵy jetistikteriniń halyqaralyq deńgeıde moıyndalýy elimizdiń Ekonomıkalyq yntymaqtastyq jáne damý uıymy (EYDU) bastamalaryndaǵy, álemdik saraptamalyq alańdardaǵy pozısııalaryn nyǵaıtýǵa múmkindik beredi.
