Ekinshi besjyldyqtyń eki óndirisi

Aqmola oblysynyń ákimdigi Indýstrııalandyrý kartasynyń ekinshi besjyldyǵy barysynda júzege asyrylǵan 2 jobanyń tusaýkeserin uıymdastyrdy. Mundaı jobalardyń biri – Selınograd aýdanynyń Aqmol aýylyndaǵy jyldyq qýaty 20 000 tonna et óndirýge baǵyttalǵan zamanaýı qus fabrıkasy. Joba quny shamamen 13 mıllıard teńgeni quraıdy. Qus etin óńdeıtin keshende 250 adam turaqty jumyspen qamtamasyz etilgen. Búgingi kúni munda 17 broıler qustarynyń kúrkesi, ınkýbator, soıý sehy jáne qus etin óńdeý boıynsha toraptar ornalasqan. Jańa kásiporynda salqyndatylǵan, ystalǵan, muzdatylǵan qus etiniń 12 túri daıyndalady. Atalǵan jobany júzege asyrý Astana qalasynyń naryǵyn otandyq qus etimen tolyqtyrýdy kózdeıdi. Sondaı-aq, oblystyń Shortandy aýdanynda polıetılen ónimderin shyǵarý boıynsha qaldyqsyz óndiris júzege asyrylýda. Kásiporyn sońǵy úsh aıda ǵana 1071 tonna, nemese 405 mıllıon teńgeniń polıetılen ónimin daıyndady. Atalǵan óndiristi iske qosý nátıjesinde Shortandy aýylynyń 37 turǵyny turaqty jumyspen qamtamasyz etildi. Búginde óndiriste túrli pishin men kólemdegi polıetılen qaltashalar, ydys-qaptar, turmystyq qaldyqtarǵa arnalǵan paketter shyǵarylady. Astanalyq oblysta 2015-2021 jyldary, ÚIIDB-2 aıasynda 644 mıllıon 700 myń teńgeniń 36 jobasy júzege asyrylady dep josparlanýda. Osynyń nátıjesinde 26 900 turaqty jumys orny ashylatyn bolady. Indýstrııalandyrý kartasyna engizilgen 36 jobanyń ishindegi 25 nysan ústimizdegi jyly paıdalanýǵa beriledi dep josparlanýda. Jobalardyń deni qurylys jáne qurylys materıaldarynyń óndirisi, agroónerkásip pen aýyl- sharýashylyq taýarlaryn qaıta óńdeý, kólik qurastyrý jáne tamaq ónerkásibi salalaryn qamtıdy. Baqbergen AMALBEK, «Egemen Qazaqstan». Aqmola oblysy.