Jýrnalıst óńir basshysynan sońǵy aptada áleýmettik jelide jarııalanǵan perzenthanadaǵy daýǵa qatysty istiń mán-jaıyn surady.
Ákimniń aıtýynsha, dáriger para surady dep aryz jazǵan ana da, pasıent jala japty degen maman da aryzdaryn qaıtyp alǵan. Soǵan qaramastan, densaýlyq saqtaý mekemesinde tekseris sharalary júrip jatyr.
«Perzenthanada qandaı júıeli problemalar bar ekenin anyqtap, shara qabyldaıtyn bolamyz. Qazirgi tańda tekseristiń nátıjesin kútip otyrmyz», dep jaýap berdi Erbol Qarashókeev.
Aıta keteıik, 35 jastaǵy Gúlim Orazbaeva altynshy balasyn Tarazdaǵy perınataldyq ortalyqqa Turar Rysqulov aýdanynan kelip bosanǵan.
Týystarynyń aıtýynsha, ishtegi balanyń úlkendigine baılanysty oǵan kesar tiligi jasalǵan.
«ÝDZ 4 kılogramm 400 gramm kórsetti. Oblystyq aýrýhanada balanyń úlken ekenin bilgen soń, ony Tarazǵa kesar tiligine jiberdi. Biraq onda ony tabıǵı jolmen bosanýǵa májbúr etti», dedi áıeldiń sińlisi Aıgerim Orazbaeva.
Otbasynyń aıtýynsha, Gúlim dárigerge aqsha aýdarǵannan keıin ǵana ony bosaný bólmesine aparǵan. Biraq bir saǵattan keıin jańa týǵan náreste shetinep ketti. Al, áıeldiń jatyry jarylyp, jansaqtaý bólimine tústi. Keıin jatyryn alyp tastaýǵa týra kelgen.
«Oǵan dereý ota jasalýy kerek edi. Olar ony beısenbide ákeldi. Kesar tiligin keıinge qaldyrdy, sodan keıin demalys kúnderine qaldy. Artynsha ol dárigerler kesar tiligi úshin 20 000 teńge talap etip jatqanyn jazdy», dedi kúıeýi Ermuhan Ámreev.
Kúıeýi qaıǵyly jaıttan keıin dárigerler 20 000 teńgeni qaıtaryp bergenin aıtady.
«Zań boıynsha, mundaı mekemelerdegi barlyq qyzmet tegin. Aqy tóleýdiń qajeti bolǵan joq. Qazir ishki tergeý bastaldy, derekter jınalyp, táýelsiz sarapshylar tartyldy. Nátıjeler keıinirek jarııalanady», dep málimdedi Jambyl oblystyq densaýlyq saqtaý basqarmasy basshysynyń orynbasary Erik Musabaev.
