Bul – halqymyz úshin jaýapty kezeń

Elimizde bolyp jatqan saıası-ekono­mıkalyq jaǵdaıdy, bizder, óner adamdary da únemi nazarda ustap otyramyz. Osy kúnderi el qulaǵyn eleń etkizgen Qazaqstan halqy Assambleıasy ókilderiniń prezıdenttik saılaýdy merzi­mi­nen buryn ótkizý týraly usy­nysyn men de shyn kóńilmen qol­daımyn. Osy usynystyń ózi hal­qymyzdyń, elimizdiń bola­shaǵyna nemquraıly qaraı almaı­tyndyǵynyń kýási, Elbasynyń júrgizip otyrǵan sarabdal saıasa­tyna kórsetilgen senim dep bile­min. Qazaqstandaǵy san alýan ult pen ulystardyń mádenı-rýhanı damýyna jaǵdaı jasalyp, qazaq halqymen birlik pen tatýlyqta bir týǵandaı ómir súrýiniń ózi úlken aqyl-parasattylyqtyń nátıjesi. Búginde egemendi elimizdi búkil álem moıyndap otyr. Elbasynyń kemeńgerligi men erik-jigeriniń nátıjesinde elimiz talaı qıyn kezeńderden ótip, damyǵan, irgesi berik, bedeldi memleketke aınaldy. Osy jolda óner adamdarynyń ózderi de álemge tanylyp, Qazaqstandy da tanytýy – Prezıdentimizdiń mádenıet pen ónerge degen erekshe kózqarasy men qamqorlyǵynyń arqasy. Elordada ashylǵan, TMD elderi arasynda teńdesi joq «Astana opera» teatry sondaı qamqorlyqtyń bir erekshe kórinisi dep oılaımyn. Osy teatrdyń jumysyn uıymdastyrý barysynda jas mamandardy tartyp, olardyń biliktiligin kóterýdiń dúnıe júziniń tanymal óner ujymdarymen shyǵarmashylyq baılanys ornatý arqyly júrgizilýine shyn júrekten qýanamyn. Sondaı-aq, jastardy qoǵamnyń órken­dep damýyna aralastyryp, balalarymyzdy álemniń tanymal bilim ordalarynan oqytyp jatqanymyzdyń ózi – el bolashaǵynyń kepili. Prezıdenttik saılaýdy merziminen bu­ryn ótkizý qazirgi álemdi jaılaǵan eko­no­mıkalyq daǵdarys kezinde elimizdiń qı­­nalmaýynyń, halyqqa aýyrt­pashylyq túsirmeýdiń kepili dep bilemin. Bul – hal­qymyz úshin ja­ýapty kezeń. Sondyqtan da, men Qazaqstan­nyń jarqyn da baqytty bo­lashaǵyna degen senim­di tek qana El­ba­sy Nursultan Nazarbaev­tyń atymen baılanystyramyn. Bıbigúl Tólegenova, KSRO halyq ártisi, KSRO jáne QR Memlekettik syılyqtarynyń laýreaty, Sosıalıstik Eńbek Eri.