Qasym-Jomart Toqaevqa óńirdiń negizgi áleýmettik-ekonomıkalyq kórsetkishteri, sondaı-aq Almaty aglomerasııasyn damytý jospary jóninde baıandaldy.
Marat Sultanǵazıev sońǵy 3 jylda oblystyń jalpy óńirlik ónimi 1,8 ese artyp, 3,4 trıllıon teńgeden 6 trıllıon teńgege óskenin aıtty.
Bıylǵy qańtar – qazan aılary aralyǵyndaǵy qysqa merzimdi ekonomıkalyq ındıkator 109,7 paıyzdy qurady.
Halyqaralyq kompanııalardyń qatysýymen taǵam ónerkásibi, logıstıka jáne metallýrgııa salalarynda jalpy somasy 470 mıllıard teńgeden asatyn 13 ınvestısııalyq joba iske asyrylýda.
Bıylǵy toǵyz aıda óńdeý ónerkásibiniń eksporty 28,5 paıyz ulǵaıyp, 618,5 mıllıon dollarǵa jetkeni jóninde málimdedi.
Bul rette eksporttyń 90 paıyzy joǵary deńgeıde qaıta óńdelgen ónimge tıesili.
Almaty oblysy aýyl sharýashylyǵyna arnalǵan memlekettik sýbsıdııalardy tıimdi paıdalanatyn jetekshi óńirlerdiń biri ekenin jetkizdi.
Bir teńge sýbsıdııaǵa 17 teńgege deıin aýyl sharýashylyǵy ónimi óndiriledi. Taýarly sút fermalarynyń sany 11-ge deıin kóbeıdi.
Sonymen qatar ákim oblystyń áleýmettik damýy týraly aqparat berdi. Bıylǵy on aıda 950 myń sharshy metrge jýyq turǵyn úı salynǵan.
Úsh aýysymdy mektepter sany 52-den 28-ge deıin qysqardy.
Qapshaǵaı sý qoımasy men ulttyq tabıǵı parkter aınalasyndaǵy týrızm klasteriniń damý barysyn tanystyrdy.
Oblysqa kelgen týrıster sany 2,2 mıllıon adamǵa jetken. Bul byltyrǵy osyndaı kezeńmen salystyrǵanda 36 paıyzǵa artyq.
Memleket basshysy oblys ákimine óńirdiń ónerkásip jáne agrarlyq áleýetin nyǵaıtý, logıstıka, týrızm salalaryn damytý, sondaı-aq turǵyndardy tolǵandyratyn ózekti máselelerdi keshendi túrde sheshý jóninde birqatar naqty tapsyrma berdi.
