Nurjan Nurjigitov aýyl sharýashylyǵynda sýdy tıimdi basqarý jáne paıdalaný baǵytynda Sý resýrstary jáne ırrıgasııa mınıstrliginiń atqaryp jatqan jumysy jóninde baıandama jasady.
Bıyl qabyldanǵan jańa Sý kodeksine sáıkes, ózdiginen sý paıdalanýǵa jol bermeý jáne sý nysandarynda, sý qorǵaý aımaqtary men beldeýlerinde sharýashylyq qyzmetti shekteý talaptaryn saqtaý jónindegi baqylaý kúsheıtildi. Basseındik ınspeksııalarǵa jedel áreket etýge múmkindik beretin qadaǵalaý ókilettikteri berildi.
Irrıgasııalyq kondomınıým ınstıtýty normatıvtik túrde bekitildi. Ol sýarý jáne kollektorlyq-drenajdyq jelilerdiń tıisti jaǵdaıda bolýyn qamtamasyz etip, fermerlerdiń ınfraqurylymdy jóndeý jáne rekonstrýksııalaý shyǵyndaryn azaıtýǵa múmkindik beredi. Qosymsha qoldaý sharasy retinde aýyl sharýashylyq qajettilikteri úshin kólemi 2 mln tekshe metrge deıin erigen, nóser jáne tasqyn sýdy jınaıtyn qoımalar salýǵa ruqsat beretin norma engizildi.
Sý únemdeý tehnologııalaryn engizýdi yntalandyrý maqsatynda memlekettik qoldaý tetikteri qaıta qaraldy: uńǵyma burǵylaý jáne sý únemdeıtin jabdyq satyp alýǵa jumsalǵan shyǵyndardyń ótemaqy úlesi 50%-dan 80%-ǵa deıin artty. Sondaı-aq sýdy sýbsıdııalaý dıfferensııalanyp, onyń mólsheri tikeleı sý únemdeý júıelerin qoldanýǵa baılanysty belgilendi.
Osy maqsattarǵa qol jetkizý úshin 2026-2028 jyldarǵa arnalǵan respýblıkalyq bıýdjetten ınvestısııalyq sýbsıdııalarǵa 214 mlrd teńgeden astam, al sýarý sýynyń qunyn sýbsıdııalaýǵa 13,5 mlrd teńge kóleminde transfertter qarastyrylǵan.
«Jalpy alǵanda, memleket qoldaý kórsetip otyrǵan sý salasyna keshendi kózqaras aýyl sharýashylyǵy sektoryn turaqty damytýǵa jáne sýmen qamtamasyz etýge múmkindik beredi dep senemiz. Bul – ulttyq qaýipsizdik pen azamattardyń ál-aýqatynyń mańyzdy quramdas bóligi. Al jergilikti atqarýshy organdardan barlyq qatysýshynyń jumysyn naqty úılestirý, is-sharalardy ýaqytyly oryndaý, bólingen qarajatty tıimdi jáne maqsatty paıdalaný, sondaı-aq jumystardyń sapasyn turaqty baqylaý talap etiledi. Tek jergilikti deńgeıde jaýapkershilikpen jumys atqarǵanda ǵana biz qoıylǵan maqsattarǵa jete alamyz», dedi Sý resýrstary jáne ırrıgasııa mınıstri Nurjan Nurjigitov.
