NU Park ýnıversıtet stýdentteri men qyzmetkerlerine ǵana emes, qala turǵyndary men qonaqtarynyń tynyǵýyna, serýendeýine taptyrmaıtyn orynǵa aınalmaqshy. Shyǵarmashylyqpen shuǵyldanatyn, ǵylym-bilimge qushtar jastarǵa da arnaıy oryndar bolady. Joba – ýnıversıtet basshylyǵy bastamashylyq etken «Qoljetimdi kampýs» baǵdarlamasynyń bir bóligi. Baǵdarlama qala turǵyndaryna ashyq, qolaıly, qoljetimdi orta qurýǵa baǵyttalǵan.
«Jobany josparlaıtyn kezde biz áıgili japon sáýletshisi Kısıo Kýrokava ázirlegen qala qurylysy tujyrymdamasyn basshylyqqa aldyq. Soǵan saı úılesimdi ıntegrasııaǵa negizdelgen saıabaq keńistigin quryp jatyrmyz. Saıabaq jastardyń belsendi demalysyna, eresekterdiń tynyshtyqta ýaqyt ótkizýine de jaıly, yńǵaıly bolady. Mańyzdysy, árkim ózine qolaıly orynda serýendeı alady. Biz saıabaqtyń elordanyń taǵy bir jańa, tartymdy demalys ornyna aınalatynyna senimdimiz. Iri qalanyń dál ortasynda ásem tabıǵatty tamashalap, shyǵarmashylyqqa den qoıýǵa ári otbasymen, dostarmen ýaqytty kóńildi ótkizýge múmkindik týady», deıdi NU prezıdenti, professor Vakar Ahmad.
Zamanǵa saı jabdyqtalatyn saıabaqtyń aýmaǵy shamamen 45 gektar jerdi alyp jatyr. Onda fýd-kort, etnoaýyl, tennıs akademııasy, at sporty mektebi, fýtbol ortalyǵy, jumys isteýge, kitap oqýǵa qolaıly aımaq, shyǵarmashylyq sheberhanalar men kórme alańdary bar art-hab, taǵysyn-taǵy oryndar qarastyrylady. Saıabaqtyń ortalyq nysany – qazaqy oıý pishinindegi jasyl labırınt. Sonymen qatar ashyq aspan astyndaǵy amfıteatr, Shyǵys mádenıeti ortalyǵy, qaıta jańǵyrtylǵan pıramıdalyq eki ǵımaratta túrli mádenı is-shara uıymdastyrylady.
Iri joba eki jylda aıaqtalyp, paıdalanýǵa beriledi. Bıyldyń ózinde aýmaqtaǵy 15 gektar jer tazartylǵan. Jumysshylar topyraqty qopsytyp, tyńaıtqysh sepken. Kógal egip, alty sý uńǵymasyn burǵylaǵan. Tal, terek, úıeńki, qaraǵash, bórtegúl, qaraǵaı, shyrsha syndy 85 000-nan astam aǵash pen buta egilgen. Tipti kampýs pen qalany kógaldandyrýǵa qajetti kóshetter ósiriletin 200 sharshy metrlik jylyjaı salynyp qoıǵan. Saıabaq qurylysynyń alǵashqy kezeńi 2026 jyly aıaqtalady dep josparlanyp otyr. Osy kezeńde úsh jylyjaı, baý-baqsha ortalyǵy, velosıped, jaıaý júrginshi joldary salynady. Qaladan ashylǵaly jatqan saıabaqtyń joba-jospary osyndaı.
