Sýretti túsirgen – Esenjol ISABEK
Pavlodar qalasynyń turǵyny Indıra Sádýaqasova áý basta kásipker bolamyn dep armandaǵan joqpyn deıdi. Tek eki balasynyń janynda bolý úshin zaýyttaǵy qyzmetinen bas tartyp, úı jaǵdaıynda qolynan keletin ispen aınalysýdy jón sanapty.
«Turaqty jumysymnan óz erkimmen shyǵyp, balalaryma qaraılasqym keldi. Kúndelikti iship-jeýimizge az da bolsa nápaqa tabý úshin úıde otyryp kásip ashyp kóreıin dep oıladym. Dámdi as ázirlegendi unatamyn. Sóıtip, alǵash ret qaltamdaǵy 15 myń teńgege 5 kılogramm et satyp alyp, manty daıyndadym. Eshbir jarnamasyz ári turaqty tutynýshysyz bastalǵan isimdi 500-ge jýyq oqyrmany bar ınstagram paraqshama saldym. Bes mınýttan keıin bir tanysym mantymnyń 3 kılosyn satyp alamyn dep jazdy. Sóıtip, as úıimde jartylaı daıyn ónimderdi ázirleýmen aınalysa bastadym», deıdi I.Sádýaqasova.
Jas kásipker pandemııa kezinde de isin toqtatpaǵan. О́ıtkeni dámi til úıirer mantysyn unatatyndardyń qatary arta túsken. Ýaqyt óte kele Indıraǵa janashyr dostary qoldaý kórsetip, kásibin keńeıtýge keńes beredi. 2023 jyly «Bıznes bastaý» baǵdarlamasyna qatysyp, 5 mln teńge kóleminde qaıtarymsyz grantqa ıe bolǵan. Memlekettik qoldaýdyń arqasynda óz ónimin patentteıdi ári sertıfıkat alady. Jalpy aýmaǵy 50 sharshy metrdi quraıtyn oryndy jalǵa alyp, adamdardy jumysqa qabyldaıdy. Kásibin áleýmettik jeli arqyly jarnamalaıdy. Qazirgi ýaqytta kásipkerdiń komandasy Pavlodar qalasynda «Magııa vkýsa» dep atalatyn saýda núktesinde taǵamnyń túr-túrin ázirleıdi.
«Etti tórt jyl kóleminde bir jetkizýshiden ǵana alyp kelemin. Odan manty, tushpara, kotlet, qyryqqabat oramasy, toqash ázirlenedi. Taǵam bıologııalyq ydyraıtyn qaptamaǵa salynady. Iаǵnı ydystan qorshaǵan ortaǵa eshqandaı zııan kelmeıdi», deıdi ol.
Munda 20 saǵat qaınatylyp pisiriletin súıek sorpasy satylady. Bul taǵam qant dıabeti, artrıt, artroz syndy býyn aýrýlaryna shaldyqqandarǵa em. Indıra qazir «Iskerlik baılanystar» baǵdarlamasyna ótinish bergen. Eger ótinimi maquldansa, otandyq kollagen ázirlemek. Joǵaryda atap ótken súıek sorpasyn suıyq túrden jele túrindegi qoıý asqa aınaldyrmaq. Mundaı tehnologııa Germanııada jasalady eken. Qazirgi kúni Koreıa, Qytaı elderiniń kollagenderi bar. Sol sııaqty otandyq kollagendi shyǵarýǵa qoldaý ári ınvestor kerek. Onyń bári ýaqyt enshisinde.
Jýyrda jas kásipker oblys kóleminde ótkizilgen «Táýelsizdik urpaqtary» baıqaýyna qatysyp, bıznes atalymynda aqshalaı syılyq jeńip aldy. Kásipkerdiń isine bereke tileımiz.
Pavlodar oblysy
