Energetıka mınıstrliginiń aqparatyna sáıkes, JJM naryǵyndaǵy jaǵdaı turaqty, iri munaı-óńdeý zaýyttary shtattyq rejimde jumys isteıdi, qorlar ishki suranysty qamtamasyz etýge múmkindik beredi.
Buǵan qosa elden munaı ónimderin zańsyz áketýdiń jolyn kesý jumystary jalǵasyp jatyr. Jyl basynan beri keden organdary men Shekara qyzmeti zańsyz áketýge 836 árekettiń jolyn kesti. Sondaı-aq Qarjy monıtorıngi agenttigi munaı ónimderin kontrabandamen ári jalǵan óńdeýmen aınalysatyn birqatar uıymdasqan toptar men kompanııalardyń qyzmetin anyqtady. Bul baǵyttaǵy jumystar jalǵasyp keledi. Bıyl Agenttiktiń óndirisinde 22 qylmystyq is boldy, onda JJM zańsyz aınalymynyń somasy 19 mlrd teńgeni qurady. Shekaranyń negizgi ýchaskelerinde mobıldi toptar jumys istep júr, reıdtik, jedel is-sharalar ótkizilip jatyr.
Jyl basynan bastap Ishki ister mınıstrligi tıisti ruqsatsyz qaıta jabdyqtalǵan kólik quralyn basqarǵan 3 334 júrgizýshini (ÁQBtK 590-babynyń 7, 10-tarmaqtary), onyń ishinde benzın baktaryn benzınge (293), dızel otynyna (108), gaz ballondy jabdyqqa (2 933) qaıta jabdyqtaǵany úshin jaýapqa tartty.
Uıymdasqan qylmysqa qarsy kúres bólimsheleri munaı ónimderin zańsyz áketýmen aınalysatyn qylmystyq toptardyń qyzmetin anyqtaý men jolyn kesý jónindegi jumysty jalǵastyryp jatyr. Jyl basynan beri munaı ónimderin urlaý, zańsyz saqtaý, tasymaldaý faktilerine qatysty 11 qylmystyq quqyq buzýshylyq anyqtaldy.
Shetelge otyn aǵynyn azaıtý maqsatynda munaı ónimderiniń jekelegen túrlerin áketýge tyıym salý uzartyldy. Buǵan qosa kólik quraldarymen shekaradan ótýge shekteýler engizildi, shekaralyq pýnktterde baqylaý kúsheıtildi. О́ńirlerde ákim orynbasarlarynyń basshylyǵymen munaı bazalary men janarmaı quıý beketterinde otynnyń bolýy men logıstıkanyń turaqtylyǵyn baqylaıtyn shtabtar jumys isteıdi.
Keńeste munaı bazalaryn munaı ónimderiniń aınalymyn esepke alý men sıfrlandyrý baqylaý quraldarymen jaraqtandyrýǵa erekshe nazar aýdaryldy. Munaı bazalarynyń bir bóligi qazirgi zamanǵy esepke alý júıelerimen jabdyqtalǵan ári naqty ýaqyt rejiminde derekterdi beredi. Mundaı qurylǵylardy ornatý mindettiligi men olardyń joqtyǵyna jaýapkershilikti bekitetin zańnamalyq túzetýler daıyndaldy. Sonymen qatar memlekettik, korporatıvtik aqparattyq júıelerdiń ıntegrasııasy júrgizilip jatyr. Bul MО́Z-den túpkilikti iske asyrýǵa deıingi otyn qozǵalysynyń ashyqtyǵyn qamtamasyz etýge múmkindik beredi.
Roman Sklıar barlyq sharalar elimizdiń turǵyndary men ekonomıkasynyń qajettilikterin basym qamtamasyz etýge baǵyttalǵanyn atap ótti. Úkimet quqyq qorǵaý, baqylaýshy organdarmen birlesip JJM naryǵyn baqylaýdy qatańdatýdy, zańsyz áketýdiń jolyn kesýdi ári otynnyń ishki naryqqa úzdiksiz jetkizilýin qamtamasyz etýdi jalǵastyrady.
