Foto: Ashyq derekkóz
Qazaqstan Qarjygerler qaýymdastyǵy dollardyń teńgege qatysty kúrt álsireýin túsindirdi. 2 jeltoqsandaǵy bırjalyq saýdada dollar birden 5 teńgege tústi. Ulttyq bank 3 jeltoqsandaǵy resmı kýrsty 508,2 teńge dep belgiledi, alaıda Almatydaǵy keıbir aıyrbastaý pýnkterinde dollar 506 teńgeden satylyp jatyr.
Sonymen qatar syrtqy faktorlardyń da áseri bar. Mamandar AQSh pen Qytaı arasyndaǵy saýda shıelenisi, munaı baǵasynyń qubylýy jáne álemdik naryqtaǵy ózgerister dollardyń álsireýine yqpal etkenin aıtady.
«Saýda kólemi aıtarlyqtaı ósip, 407,3 mln dollarǵa jetti. Ulttyq banktiń shetel valıýtasyn úlken kólemde satýy (shamamen 1,4 mlrd dollar), kvazımemlekettik sektor sýbektileriniń valıýtalyq túsimdi konvertasııalaýy, eksporttaýshylardyń belsendiligi jáne rezıdent emesterdiń teńgemen aktıvterge qyzyǵýshylyǵynyń qaıta artýy bıznes pen halyq tarapynan bolǵan jergilikti dollar suranysyn aıtarlyqtaı basyp ozdy», dep atap ótti sarapshylar.
Ekonomıst Beknur Qısyqovtyń pikirinshe, teńge baǵamyna AQSh pen Qytaı arasyndaǵy saýda soǵysy da áser etip otyr.
«О́zderińiz bilesizder, AQSh Qytaıǵa jáne basqa da elderge óte joǵary tarıfter engizdi. Sonyń nátıjesinde olardyń nazary ishki resýrstar men óndiriske aýysty. Biraq bul óndiris rentabeldi bolýy úshin ulttyq valıýtany sál álsiretý qajet. Sondyqtan KTK-ǵa qatysty jaǵdaı aıasynda munaı baǵasy da azdap qubyldy. Ol ósti, árıne. Bul da dollardyń qunyna áser etedi», dedi ekonomıst.
Onyń boljamynsha, jyl basynda dollar baǵamy qaıta ósip, 530-540 teńge deńgeıine jetýi yqtımal.
