Foto: Sý resýrstary jáne ırrıgasııa Mınıstrligi
Mınıstr Nurjan Nurjigitov jas ónertapqysh Dana Qadyrbekpen arnaıy kezdesý ótkizip, onyń aýadan sý jınaýǵa arnalǵan jańa tehnologııasymen tanysty. Oqýshynyń oılap tapqan qurylǵysy zamanaýı nanomaterıaldardy paıdalanyp, elektr jelisine táýelsiz jumys isteıdi jáne aýadaǵy ylǵaldy tıimdi kondensasııalaýǵa múmkindik beredi.
Kezdesý nátıjesinde mınıstrlik pen jas ǵalym jobany birlesip taldap, pılottyq rejımde synaqtan ótkizýge, ǵylymı derektermen almasýǵa jáne tehnologııanyń keń aýqymdy qoldanysyn zertteýge baǵyttalǵan memorandýmǵa qol qoıdy.
Mınıstr Nurjan Nurjigitov atalǵan jobany júzege asyrýǵa barlyq jaǵdaı jasalatynyn aıtyp, Ǵylym jáne ınnovasııalyq tehnologııalar departamentine pılottyq engizý jumystaryna qoldaý kórsetýdi tapsyrdy. Ol Dana Qadyrbekke alǵys hat pen syılyq tabystap, sý únemdeý máselesin kótergen jas talanttardy qoldaýdyń mańyzyn atap ótti.
«Daryndy jastardyń sý únemdeý máselelerine beıjaı qaramaı, biregeı ǵylymı jobalar ázirlep, júzege asyryp júrgeni qýantady. Biz bul jobany burynnan baqylap kelemiz. Ol sý resýrstaryn únemdeýde erekshe sheshim usynady, bul ásirese shalǵaı aımaqtar úshin mańyzdy. Qurylǵynyń ylǵal az kezde de atmosferadan sý jınaı alýy onyń praktıkalyq qoldanylýyn keńeıtedi. Qazirgi zamanaýı nanomaterıaldar men kún energııasyn qoldaný bul jobany «jasyl» ınnovasııalardyń mańyzdy jobasyna aınaldyrady», dedi Sý resýrstary jáne ırrıgasııa mınıstri Nurjan Nurjigitov.
Dananyń jumysy buǵan deıin halyqaralyq deńgeıde joǵary baǵalanǵan. Onyń jobasy Ońtústik Koreıadaǵy WICO halyqaralyq kórmesinde 36 elden kelgen qatysýshylar arasynan birinshi oryn alyp, Indonezııadaǵy YISF halyqaralyq jármeńkesinde de top jardy. Sonymen qatar QazUÝ-dyń ǵylymı konferensııasynda jáne Kazakhstan Smart Space baıqaýynda júldeli bolǵan.
Jas ónertapqyshtyń ázirlemesi UNIDO-men birlesken Global Cleantech Innovation Programme (GCIP) halyqaralyq baǵdarlamasynyń jartylaı fınalyna da engen. Bul baǵdarlamaǵa Qazaqstan boıynsha 500-den astam ótinish túsken edi.
«Búgingi kezdesý óte jaqsy áser qaldyrdy. Sý resýrstary jáne ırrıgasııa mınıstrliginiń jas ǵalymdarǵa belsendi qoldaý kórsetip jatqany erekshe qýantady. Mundaı qoldaý meniń ǵylymı jumysymdy ári qaraı jalǵastyrýyma úlken motıvasııa beredi. Mınıstrdiń búgin bergen tapsyrmasynyń arqasynda biz qurylǵyny dalalyq jaǵdaıda synap kórýge jáne jobany pılottyq rejımde iske asyrýǵa múmkindik alamyz», dedi Dana Qadyrbek.
