Is-sharaǵa Qurlyq áskerleriniń basshylyǵy, Qarýly kúshterdiń ardagerleri, astanalyq qorǵanys isteri jónindegi departamentiniń ókilderi jáne sarbazdardyń ata-analary men jaqyndary da qatysty.
Astanalyq 68665 áskerı bólimi jas órenderi dástúr boıynsha «Otan Ana» monýmentine gúl shoqtaryn qoıyp, qatysýshylar qazaq jaýyngerleriniń erligin bir mınýt únsizdikpen eske aldy.
Saltanatty is-sharada ásker qataryna endi qosylǵan jas sarbazdar Qurlyq áskerleri bas shtabynyń bastyǵy – bas qolbasshynyń birinshi orynbasary general-maıor Qýanyshbek Úshtaev quttyqtady.
– Bul rásim el úshin de erekshe kún. Osylaısha sarbazdar Otan aldynda ant berip, halqymyzdyń tynyshtyǵy men qaýipsizdigin qorǵaýǵa úlken qadam jasaıdy. Ant – jaı sóz emes, bul árbir erazamattyń ómirlik qaǵıdaty, abyroıy men qadir-qasıeti. Áskerı qyzmet berik tárbıe jáne bolashaq jetistikterdiń bastaýy bolady, – dedi ol.
Jas sarbazdar astanalyq brıgadaǵa elimizdiń ár óńirinen kelgen. Solardyń biri Túrkistan oblysynyń azamaty Ernur Dosymhan áskerge óz erkimen shaqyrylǵanyn aıtty.
– Kópbalaly otbasynanmyn, on úsh baýyrym bar. Árıne, olardy saǵyndym, degenmen áskerı tájirıbe meniń bolashaq ómirime nyq qadam bolatynyna senemin. Osy sátke – ant qabyldaýǵa qatarlastarymmen barynsha daıyndaldyq. Jas jaýynger kýrsynda kóp nárse úırendim jáne áskerdiń tynys-tirshiligine etim úırenip qaldy, – deıdi sarbaz.
Ant qabyldaǵannan keıin sarbazdar alańda saltanatty marsh jasap, áskerı-patrıottyq ánderdi oryndady. Áskerı jıynda 68665 áskerı bólimniń eki ofıserine – kapıtan Suńǵat Qabdyrovqa jáne aǵa leıtenant Ernar Kenjebaıǵa Qarýly kúshterdiń ardageri general-maıor Álıhan Jarbolov mereıtoıly medalin tapsyrdy.
Odan keıin qoıan-qoltyq urys elementteriniń kórsetilimi jáne qurmet qaraýyl rotasynyń áskerı defıle kórsetýimen aıaqtaldy.
