Foto: Ashyq derekkóz
Senattyń jalpy otyrysynda sóz sóılegen depýtat Gennadıı Shıpovskıh jastardyń qarjylyq uıymdarǵa qaryzǵa batý deńgeıi alańdatarlyq deńgeıge jetkenin málimdedi. Onyń aıtýynsha, kóptegen jastar mıkroqarjy uıymdarynyń birneshe mınýtta rásimdeletin paıyzdyq mólsherlemesi joǵary nesıelerge júginýge beıim.
Senatordyń sózine qaraǵanda, bul jaǵdaı áleýmettik turaqtylyqqa qaýipti tendensııa qalyptastyryp otyr. Jastar arasynda qaryz júktemesiniń artýyna qarjylyq saýattylyqtyń tómendigi, mıkroqarjy uıymdarynyń baqylaýsyz jarnamasy jáne nesıeni óte jeńil rásimdeý múmkindigi negizgi sebepke aınalǵan.
«Sonymen qatar, mıkrokredıttik uıymdardy retteýdegi kemshilikter de jaǵdaıdy ýshyqtyryp jatyr. Jeke derekterdi engizý arqyly birneshe mınýt ishinde nesıe rásimdeý múmkindigi jastardy oılanyp-tolǵanbastan qarjylyq mindetteme qabyldaýǵa ıtermeleıdi. Bul olardyń psıhologııalyq jaı-kúıine teris áser etip, kúızelis pen áleýmettik oqshaýlanýǵa ákelýi múmkin. О́mirlerine balta shabylady desek te artyq bolmaıdy», dedi Gennadıı Shıpovskıh.
Depýtat salalyq agenttiktiń jastar arasyndaǵy mıkrokredıt alý statıstıkasyn júrgizbeıtinin de synǵa aldy. Onyń aıtýynsha, bul máseleniń naqty aýqymyn baǵalaýǵa kedergi keltirip otyr.
Osyǵan baılanysty senator mıkronesıeler berý sharttaryn qatańdatýdy usyndy. Ol 18 jastan bastap tekserýsiz nesıe rásimdeý tájirıbesin toqtatyp, mıkronesıeni keminde 21 jasqa tolǵan azamattarǵa ǵana berý máselesin qarastyrýdy usyndy. Sonymen qatar, jas qaryz alýshylardyń qarjylyq jaǵdaıyn baǵalaý jáne mektepter men kolledjderde qarjylyq saýattylyqty mindetti pán retinde engizýdi qarastyrýdy usyndy.
