Foto:depositphotos.com
Qazaqstan qor bırjasynda dollar – 499,6 teńge
Teńgeniń nyǵaıýy – «daýyl aldyndaǵy tynyshtyq» pa? Ulttyq bank tóraǵasy Tımýr Súleımenov teńgeniń nege nyǵaıyp jatqanyn jáne aldaǵy ýaqytta baǵamnan ne kútý kerektigin túsindirdi.
Sońǵy aptalarda teńge dollarmen salystyrǵanda kúsheıip keledi, oǵan qaramastan, shetel valıýtasyna suranys joǵary. Ulttyq bank muny eki negizgi faktordyń úılesimimen baılanystyrady: ishki naryqtaǵy belsendilik pen bazalyq mólsherlemeniń 18 paıyzǵa deıin kóterilýine baılanysty iri portfeldik ınvestısııalardyń kelýi.
«Kóptegen kásiporyndar men úı sharýashylyqtary QQS 16 paıyzǵa kóterilmeı turyp, aldyn ala satyp alýǵa tyrysyp jatyr. Import dollarlyq kelisimsharttar arqyly qarjylandyrylady, sondyqtan dollarǵa suranys óte joǵary», dedi T.Súleımenov.
Sonymen qatar, onyń aıtýynsha, mólsherlemeniń ósýi teńgemen shyǵarylatyn qarjy quraldaryn sheteldik ınvestorlar úshin tartymdy etti.
«London, Nıý-Iork, Abý-Dabıdegi ınvestısııalyq qorlar dollardy teńgege aıyrbastap, bizdiń oblıgasııalarymyzdy satyp alyp jatyr. Bul naryqtaǵy dollar usynysyn arttyrady», dedi ol.
Ulttyq banktiń málimetinshe, portfeldik ınvestısııalar kólemi aıtarlyqtaı ósip, naryqqa qosymsha dollar berip, teńgeniń nyǵaıýyn kúsheıtken.
Jańa jyldan keıin dollar ósedi me?
T.Súleımenov 1 qańtardan bastap QQS ósse de, dollar baǵamy kúrt qymbattaıdy degen kúdikterdi joqqa shyǵardy.
«Joq, árıne. Baǵam máselesi kóbine syrtqy faktorlarǵa baılanysty. QQS-nyń ósýi baǵalarǵa áser etýi múmkin, biraq bul ishki másele – nan, sút, birinshi qajettilik taýarlary. Bul valıýta baǵamyna qatysty emes», dep túsindirdi ol.
Onyń aıtýynsha, saýdagerler men óndirýshilerdiń edáýir bóligi baǵany aldyn ala kóterip qoıǵan, ári «suranys sheksiz emes».
«Syrtqy makroekonomıkalyq orta qazir biz úshin turaqty. Munaıdyń kútiletin baǵasy – barreline shamamen 60 dollar. Baǵam boıynsha qandaı da bir kúrt ózgeristerdi kútip otyrǵan joqpyz», dedi Ulttyq bank basshysy.
28 qarashada Ulttyq bank bazalyq mólsherleme boıynsha sheshim qabyldady – ol 18 paıyz deńgeıinde saqtaldy.
