Vıse-premer Leıa Gýterresti jyly qarsy alyp, bıylǵy shildede qyzmetke taǵaıyndalýymen quttyqtady. Ol 1994 jyldan beri jalǵasyp kele jatqan kópjyldyq áriptestiktiń mańyzyn atap ótti.
«Azııa damý banki – biz úshin strategııalyq áriptes. Yntymaqtastyq kezeńinde Bank kólik, energetıka, ShOB, sıfrlyq damý, áleýmettik birqatar mańyzdy jobany qarjylandyrdy. Búgingi kezdesý áriptestigimizdi odan ári nyǵaıtýǵa, jańa perspektıvalyq bastamalardy júzege asyrýǵa yqpal etetinine senimdimiz. ADB-nyń Qazaqstan boıynsha 2023–2027 jyldarǵa arnalǵan eldik strategııasynyń negizgi basymdyqtary bizdiń ulttyq basymdyqqa tolyq sáıkes keletinin atap ótkim keledi. Qazaqstan budan ári de osy strategııany tıimdi júzege asyrýdy qoldaıdy», dedi ol.
Yntymaqtastyq ornaǵan sátten bastap ADB Qazaqstanǵa tehnıkalyq kómek pen grant túrinde 7 mlrd dollardan asa qaryz berdi.
О́z tarapynan Leıa Gýterres qazaqstandyq tarapqa syndarly dıalogi úshin alǵys bildirip, ADB Jarǵysyn túzetý boıynsha daýys berý kezinde Qazaqstandy qoldaýdyń mańyzdylyǵyna toqtaldy. Qajetti daýys berý shegine jetýdiń nátıjesinde túzetý Bankti kredıtteýdiń jıyntyq kólemin 50%-ǵa – 36 mlrd dollardan asyrýǵa múmkindik beredi. Onyń aıtýynsha, bul sheshim ADB-nyń damýshy múshe elderdiń basym mindetterin sheshýdegi kúsh-jigerin qoldaýdy edáýir keńeıtedi.
«Bizdiń yntymaqtastyǵymyzdyń barysynda 1994 jyldan bastap ADB Qazaqstanǵa 7 mlrd dollardan kóp qarajat berdi. Biz dástúrli baǵytta da, jańa sektorda da áriptestikti odan ári arttyrýǵa senemiz», dedi ol.
Ol sondaı-aq bıyl ADB strategııalyq materıaldardyń qun tizbegin qoldaýǵa arnalǵan asa mańyzdy mıneraldar salasyndaǵy jańa saıasatty júzege asyrýǵa kiriskenin habarlady. Bank osy salada turaqty áleýeti bar elimizdegi jańa jobalardy zerdeleýge daıyn.
Vıse-premer sondaı-aq, Qazaqstan Úkimeti ADB, EADB, EQDB jáne Dúnıejúzilik bankti qosqanda, halyqaralyq qarjy uıymdarynyń úzdik álemdik tájirıbesi men usynymdaryn eskere otyryp, MJÁ týraly zańnamany jetildirýde júıeli jumys júrgizip jatqanyn habarlady.
Kezdesý sońynda taraptar kólik pen ónerkásiptik ınfraqurylymda, tehnologııada, energetıkada, synı materıaldar salasynda, turǵyn úı qurylysy men basqa da sektordaǵy yntymaqtastyqtyń aǵymdaǵy jáne perspektıvalyq baǵytyn talqylady.
