Foto: Ashyq derekkózden
Kásipkerdiń aıtýynsha, Prezıdent kompanııa jumysyna erekshe qyzyǵýshylyq tanytyp, óndiristiń tolyq sıkli, eksporttyq múmkindikteri jáne ónim sapasy týraly surady. «Bal Tekstıl» – jip ıirýden bastap daıyn kilem shyǵarýǵa deıingi prosesti tolyq atqaratyn, jergilikti shıkizatty paıdalanatyn kásiporyn. Kompanııa Reseı, Qyrǵyzstan, О́zbekstan, Tájikstan jáne Qytaı naryǵyna ónim eksporttap otyr.
Búginde zaýytta 20 zamanaýı stanok jumys isteıdi, óndiriste 500-den astam adam eńbek etedi. Qazaqstannyń barlyq óńirinde 400-den astam dıstrıbıýtor bar, olardyń esebinen jalpy 3 myńǵa jýyq adam otandyq ónim óndirisimen aınalysyp otyr.
Talǵat Ysqaqov Memleket basshysyna jergilikti polıpropılen jibin qoldaný básekege qabilettilikti arttyrǵanyn aıtty. Prezıdent kompanııa jumysyna oń baǵasyn berip, ónim baǵasy, satylym kólemi jáne sheteldik brendtermen báseke týraly surap, aldaǵy ýaqytta fabrıkaǵa baryp, jumysymen jeke tanysatynyn jetkizdi.
Marapattaý rásiminde Memleket basshysy otandyq óndiristi qoldaýdyń mańyzyn atap ótip, eksportqa baǵyttalǵan, jergilikti shıkizatqa súıenetin jáne zamanaýı tehnologııalardy qoldanatyn kásiporyndarǵa basymdyq berilýi tıis ekenin aıtty.
Kásipkerdiń sózinshe, mundaı qoldaý qazaqstandyq bıznestiń damýyna serpin berip, otandyq óndirýshilerge jańa múmkindikter ashady.
