Máýlen Áshimbaev is-sharaǵa qatysýshylarǵa iltıpat bildirip, Memleket basshysy Qazaqstan halqyna Joldaýynda belgilep bergen óńdeý ónerkásibiniń basym baǵyttaryna nazar aýdardy. Palata spıkeri olardy ýaqtyly ári sapaly iske asyryp, jańa óndiris oryndaryn ashý úshin zamanaýı tásilderdi qoldaný, memlekettik organdar men bıznestiń tyǵyz ózara is-qımyly mańyzdy ekenin atap ótti. Mundaı qadam salanyń ishki naryqtaǵy ustanymyn nyǵaıtyp, ony halyqaralyq deńgeıde damytýǵa yqpal etedi.
«Prezıdent Qasym-Jomart Toqaev bıylǵy Joldaýynda óńdeý ónerkásibin damytýdyń mańyzdy ekenin aıryqsha atap ótti. Jalpy, mashına jasaý ǵylymdy qajet etetin, kúrdeli jáne ozyq sala retinde eldiń ındýstrııalyq damýynyń negizgi draıverleriniń biri sanalady. Bul sektor ekonomıkanyń aralas salalaryna mýltıplıkatıvti áser etedi. Sondaı-aq onyń ónimderiniń qosylǵan quny joǵary ekeni belgili. Sondyqtan Parlament Memleket basshysy júktegen mindetterdiń oryndalýy úshin dáıekti túrde salany qoldaý júıesin qalyptastyryp keledi», dedi Senat tóraǵasy.
Sondaı-aq ol senatorlar Qazaqstan mashına jasaýshylar odaǵymen birlesip ázirlegen mashına jasaýdy damytýǵa arnalǵan zań jobasyna erekshe mán berip, Palatanyń osy baǵyttaǵy jumysyna keńirek toqtaldy. Qujat avtomobıl ónerkásibin órkendetýge, salalyq klasterler qurýǵa, arnaıy ekonomıkalyq aımaq pen ındýstrııalyq aımaqtardy damytýǵa jáne dýaldy oqytýǵa qatysty mańyzdy sharalardy qamtıdy.
Otyrys barysynda Úılestirý keńesiniń músheleri belgili bir nátıjelerge qaramastan, salada áli de bolsa jetildiretin tustar bar ekenine nazar aýdardy. Sonyń ishinde Qaraǵandy oblysynyń Saran qalasynda ótken mashına jasaýdy damytý máselelerine arnalǵan dóńgelek ústelde aıtylǵan birqatar mindet jan-jaqty sóz boldy. Olardy Mashına jasaýdy damytýdyń 2024–2028 jyldarǵa arnalǵan keshendi jospary aıasynda qosymsha pysyqtaý qajet. Naqty aıtqanda, kadr tapshylyǵy, jabdyqty jańartý úshin zamanaýı tehnologııalar men ınvestısııalardyń jetkiliksizdigi, ımportqa táýeldilik sııaqty túıtkilder óte ózekti. Búginde munaı-gaz, taý-ken metallýrgııasy, energetıkalyq mashına jasaý sııaqty mashına jasaýdyń birqatar strategııalyq segmentinde oqshaýlaý deńgeıi 20–30 paıyzdy quraıdy. Al bilikti mamandarǵa degen qajettilik 7 myń adamǵa jetken.
Sonymen qatar is-sharada iri ónerkásiptik jobalardyń qyzmeti men aralyq nátıjelerine, oqshaýlaý deńgeıine, jabdyqty jańǵyrtýǵa jáne shyǵarylatyn ónim jelisin keńeıtýge qatysty pikirler men usynystar aıtyldy. Sıfrlandyrý jáne zamanaýı tehnologııalyq sheshimderdi engizý máseleleri de talqylandy.
Jalpy, otyrysqa Premer-mınıstrdiń birinshi orynbasary, Úılestirý keńesiniń tóraǵasy Roman Sklıar, «Qazaqstan mashına jasaýshylar odaǵy» ZTB basqarma tóraǵasy Meıram Pishembaev pen salalyq mınıstrlikter men jetekshi otandyq kásiporyndardyń ókilderi qatysty.
