Alıaska (AQSh) men Kanada aýmaǵyndaǵy Iýkon jerine jaqyn óńirde qýatty 7 balldyq jer silkinisi tirkeldi. Sýnamı qaýpi jarııalanǵan joq, al bılik ókilderi qırandylar nemese zardap shekkender týraly jedel aqparat túspegenin málimdedi.
AQSh Geologııalyq qyzmeti (USGS) jer silkinisi Alıaskadaǵy Djýno qalasynan shamamen 370 km soltústik-batysta jáne Iýkon astanasy Ýaıthorstan 250 km batysta bolǵanyn málimdedi.
Ýaıthorsta Kanadanyń koroldik atty polısııasynyń serjanty Kalısta Makleod jedel qyzmetke jer silkinisi týraly 911 nómirine eki qońyraý túskenin aıtty.
Kanada Tabıǵı resýrstar mınıstrliginiń seısmology Elıson Bıordtiń aıtýynsha, eń qatty silkinis bolǵan Iýkon aýmaǵy – taýly jáne halyq óte sırek qonystanǵan óńir.
Kóbine adamdar sórelerden jáne qabyrǵalardan zattar qulap jatqany týraly habarlap jatyr. Qurylymdyq zaqym kórgen nysandar baıqalmady, – dedi ol.
Epısentrge eń jaqyn kanadalyq eldi meken – Haıns-Djankshen, ol shamamen 130 km jerde ornalasqan. Iýkon statıstıka bıýrosynyń deregine sáıkes, 2022 jyly bul aýylda 1018 adam turǵan.
Jer silkinisi Alıaskadaǵy Iаkýtat qalasynan shamamen 91 km qashyqtyqta boldy. AQSh Geologııalyq qyzmetiniń málimetinshe, qala turǵyndary – 662 adam.
Jer asty dúmpýi shamamen 10 km tereńdikte bolǵan, odan keıin birneshe álsiz qosymsha tolqyndar tirkeldi.
