«Ǵasyrlar jańǵyryǵy» atty sán kórsetiliminde dızaınerler tabıǵı materıaldardan túrli jas erekshelikterine saı etip ázirlegen kıimder toptamalaryn usyndy. О́ner mýzeıinde uıymdastyrylǵan sheberlik sabaǵynda Qyrǵyzstannan jáne Almatydan kelgen ulttyq qolóner mamandary qumyra jasaý, júnnen buıymdar daıyndaý syrmaq syrý men kádesyılar daıyndaý, súıek jáne terini óńdeý boıynsha sheberlik sabaqtaryn ótkizdi. Is-sharadan soń ulttyq qolónerdi damytýǵa erekshe úles qosyp júrgen sheberler arnaıy marapatqa ıe boldy.
Etnofestıvaldiń úshinshi kúni ulttyq sportqa arnaldy. «Salbýryn» ataýymen uıymdastyrylǵan is-shara ıppodromda jalǵasty. Bul jerge saıatshylyq ónerdi nasıhattap, qusbegilikpen aınalysyp júrgender jáne tazy baptaýshylar jınaldy. Kókpar uıymdastyrylyp, asyq atý saıysy da ótti. «Jappaı kókparǵa 50-ge jýyq shabandoz qatysty. Olardyń arasyna aýdaryspaqtan álem jáne Qazaqstan chempıondary bar. Qusbegilik boıynsha segiz qyran, tazylar jarysyna 20-ǵa jýyq iriktelgen tazy qatysyp, Alǵa, Áıteke bı, Mártók, Shalqar aýdandarynan kelgen komandalar kózge tústi. Qusbegilik saıysynda Aqmola oblysynan kelgen Seıilbek Jaqashev pen Beısembek Muhamedáliniń jáne Aqtóbe oblysynyń turǵyny Janarbek Taıbasardyń qyrandary ozyp shyqty», dedi oblystyq ulttyq sport qaýymdastyǵynyń atqarýshy dırektory Azat Jóken.
Sondaı-aq «Sybaǵa» meıramhanasynda uıymdastyrylǵan «Kóneden jetken dám» gastro-festıvalinde Aqtóbe oblysynyń on eki aýdany ertedegi túrli joralǵylarǵa qatysty daıyndalatyn taǵam túrlerin usyndy. Qazirgi zamanda umytylǵan, biraq salt-dástúrge saı sımvoldyq máni joǵary syı-sybaǵalar daıyndaǵan Oıyl, Yrǵyz aýdandarynan kelgen aspazdar úzdik dep tanyldy.
Aqtóbe oblysy.
