Is-sharanyń uıymdastyrýshysy – Qazaqstan kınologtar odaǵy tek kórmeler men baıqaýlarmen shektelmeı, ózderiniń shynaıy jumys qaýqaryn kórsetý úshin 15 myqty tazy iriktep alǵan.
Bul synaqtar qazaqy ıt tuqymyn saqtaý, molaıtý men asyldandyrý jáne onyń halyqaralyq deńgeıde tanylýyn qamtamasyz etýge baǵyttalǵan keshendi jumystyń bóligi.
Dala jaǵdaıyndaǵy baǵalaý – formaldy rásim emes. Jabaıy ańdy alǵan tazynyń qabileti arqyly tuqymnyń tarıhı ańshylyq qasıetterin saqtap, ony ári qaraı asyldandyrý maqsatynda qoldanýǵa laıyqtylyǵy aıqyndalady.
Bul is-shara, buǵan deıin Astana mańynda júrgizilgen synaqtyń jalǵasy boldy. Astanada ıtter orqoıanǵa salynsa, bul joly tazylar qumqoıan aýlady, bul óz kezeginde qýý sıpatyn túbegeıli ózgertedi.
Orqoıan kóbine joǵary jyldamdyqpen túzý baǵytta qashsa, qumqoıan júgiris baǵytyn jıi ózgertip, ıtten jedel áreket etýdi talap etedi.
Qazaqy tazy boıynsha tájirıbeli mamandardan quralǵan sarapshylyq komıssııa ıtterdi kelesi negizgi kórsetkishter negizinde baǵalady:
Jyldamdyq pen manevr - tazynyń qanshalyqty tez jáne qoıannyń sońynan baǵytyn qanshalyqty shapshań ózgerte alatyny;
Izdeý jáne ıis sezimin paıdalaný - tazynyń ańdy ózdiginen tabý qabileti, ıisti jáne jeldi paıdalanýy;
Tózimdilik - ıttiń uzaq ýaqyt boıy joǵary jumys qarqynyn saqtaı alýy;
Intellekt jáne qýý sheberligi - tazy qoıannyń qylyǵyn «oqı» bilýi jáne onyń qashý baǵytyn aldyn ala boljaı alýy.
Qatysýshylardyń daıyndyq deńgeıi joǵary boldy, júldeli oryndar úshin kúres tartysty ótti. Synaq nátıjeleri:
1-oryn: Áreket, ıesi – «NOMAD» ulttyq ańshylyq klýby» qoǵamdyq qory;
2-oryn: Adyrna, ıesi - «NOMAD» ulttyq ańshylyq klýby» qoǵamdyq qory;
3-oryn: Qablan, ıesi – Mýptekeev Ernar.
Qazaqstan kınologtar odaǵy aldaǵy ýaqytta mundaı synaqtar qazaqy tazy boıynsha dalalyq tekserýler men asyldandyrý jumysynyń biryńǵaı júıesiniń negizine aınalatynyn atap ótti. Osyndaı is-sharalardy júıeli túrde ótkizý jáne olardy tazyny asyldandyrý jumysynyń mindetti talaby qylý josparlanyp otyr.
Bastama elimizdiń túkpir-túkpirindegi ańshylar men tazy ósirýshiler tarapynan qoldaý tapty.
Eger qazaqy tazyny tek fotosýretter men ańyzdarda ǵana emes, naqty jumys isteıtin ańshylyq ıt retinde saqtap qalǵymyz kelse, dalalyq synaqtar qalypty jáne turaqty tájirıbege aınalýy tıis.
