Tıisti qaýlyǵa qalanyń bas memlekettik sanıtar dárigeri Aıgúl Shagaltaeva qol qoıdy. Sanıtarlyq qyzmet dereginshe, naýqastardyń shamamen 25%-y – oqýshylar, barlyǵy 3 430 jaǵdaı tirkelgen. Zerthanalyq taldaýlardyń basym bóliginde tumaýdyń A(H3N2) vırýsy («gonkongtyq» shtamm) anyqtalǵan. Ol 14 jasqa deıingi balalarda 23% jaǵdaıda kezdesip otyr.
Negizgi sharalardyń biri — mektepter men balabaqshalarda «tańǵy súzgi» engizý. Oqý bastalar aldynda oqýshylardyń, tárbıelenýshilerdiń jáne pedagogterdiń densaýlyǵy kún saıyn tekseriledi. JRVI nemese tumaý belgileri bar balalar men qyzmetkerler sabaqqa jiberilmeıdi.
Eger bir synyptaǵy JRVI kórsetkishi oqýshylar sanynyń 30% jáne odan joǵary deńgeıine jetse, epıdemıologııalyq jaǵdaı turaqtanǵanǵa deıin synyptar qashyqtan oqytý formatyna kóshiriledi.
Al synyptaǵy 20-30% oqýshy ınkýbasııalyq kezeń ishinde syrqattansa:
- Kabınet júıesi ýaqytsha toqtatylady;
- Jańa oqýshylardy qabyldaýǵa 10 kúnge tyıym salynady.
Sonymen birge bilim berý uıymdaryna:
- Bólmelerdegi temperatýrany +18…+22°S deńgeıinde saqtaý;
- Ylǵaldy tazartý men jeldetýdi kúsheıtý;
- Úzilis ýaqytyn uzartý;
- Sanıtarlyq toraptardy qajetti gıgıenalyq quraldarmen qamtamasyz etý;
- Buqaralyq is-sharalardy shekteý tapsyryldy.
Bılik oqýshylarmen tumaý men JRVI-diń aldyn alý jóninde túsindirý jumystaryn júrgizýdi, sondaı-aq mektep medpýnktterin qajetti qural-jabdyqtarmen jáne preparattarmen qamtamasyz etýdi usyndy.
