Alty ishekti gıtara úninen ıirimi bólek áýen izdedi. Bir áýeni ózgesinde qaıtalanbaıtyn birneshe án shyǵardy. Kóbiniń mátini óziniki bolǵanymen, Muqaǵalı Maqataev, Farıza Ońǵarsynova, Esenǵalı Raýshanov, Svetqalı Nurjanov jáne ózge de biregeı aqyndardyń óleńderine án shyǵardy. El ishine keń taralǵan sondaı týyndysynyń biri – «Sáıgúlik». Sózin mańǵystaýlyq aqyn, Memlekettik syılyqtyń laýreaty Svetqalı Nurjanov jazǵan. Qazir jıi oryndalatyn ánge aınaldy.
Elimizdiń ár óńirinde Tabyldy Dosymovtyń rýhty ári lırıkalyq ánderin oryndap júrgen ónerpazdar shoǵyry bar. Al Inder aýdanynda bardtyń shyǵarmalaryn gıtaramen oryndaıtyndar tipten kóp. О́ner saparynda ózgeshe órnek qaldyrǵan san qyrly talanttyń 60 jyldyǵyna oraı Inderbor kentindegi saıabaqqa 60 ónerpaz jınaldy. Bári de osy aýdanda turady. Olardyń arasynda jasamys ta, bozbala men jasóspirim de, ana men boıjetken de bar.
Bir ereksheligi, 60 ónerpazdyń bári de Tabyldysha gıtara shertti. Olar saıabaqtaǵy bard eskertkishi janynda «Sáıgúlik» ánin birge shyrqady. Tabyldy Dosymovtyń kózin kórgender onyń ómir joly men shyǵarmashylyǵy jóninde áserli estelik aıtty. «Ánderin shyrqaıtyn izbasarlary bar da, bard Tabyldy Dosymovtyń aty da, shyǵarmashylyq murasy da jańǵyra beredi», deıdi Táýirbek Bozekenov.
Atyraý oblysy
