foto: polisia.kz
Almaty polısııa departamentiniń málimetinshe, keshki saǵat 20:00-den búgin tańǵy 06:00-ge deıin 58 jol-kólik oqıǵasy tirkelgen. Saldarynan 9 adam jaraqat aldy, qaza bolǵandar joq.
Polısııa kúsheıtilgen rejımde jumys istep, jol qaýipsizdigine erekshe nazar aýdaryp otyr. Patrýldik polısııa ekıpajdary barlyq shaqyrtýlarǵa jedel áreket etip, jol-kólik oqıǵalaryn resimdeýdi qamtamasyz etip jatyr. Sondaı-aq kóshelerdi tazalaý jáne jol jabyndysyn óńdeý jumystaryna jumyldyrylǵan kommýnaldyq qyzmetterge kómek kórsetýde.
«Alǵashqy qar – jol qozǵalysy úshin árdaıym synaq. Biz júrgizýshilerdi barynsha saq bolýǵa, qashyqtyqty jáne jyldamdyq rejımin saqtaýǵa shaqyramyz. Kólikti qys maýsymyna aldyn ala daıyndaý óte mańyzdy: shınalardy aýystyryp, tehnıkalyq jaǵdaıyn tekserý qajet. Eger avtomobıl qysqy jaǵdaıǵa daıyn bolmasa, jolǵa shyqpaǵan jón. Bizdiń basty mindetimiz – júrgizýshilerdiń qaýipsizdigin saqtaý», dedi Almaty qalasy PD Ákimshilik polısııa basqarmasynyń bastyǵy Serik Shumaev.
Almaty polısııa departamenti qala turǵyndaryn jolda barynsha saq bolýǵa, qysqy jaǵdaıdy eskerýge jáne jol qozǵalysy erejelerin buljytpaı saqtaýǵa shaqyrady.
Aıta keteıik, buǵan deıin Almaty qalasynda bir túnde jarty aıdyń normasyndaı qar jaýyp tastaǵanyn habarlaǵan edik. Qardyń qalyńdyǵy 35 santımetrge deıin jetken.
