Foto: Ashyq derekkóz
Onyń aıtýynsha, Memleket basshysy qoıǵan jasandy ıntellekt pen tolyq sıfrlandyrý mindetteri mıkroshemalardy jobalaý salasynsyz oryndalmaıdy.
Depýtat qazirgi mıkroshemalardyń mańyzyna toqtalyp, olardyń turmystyq tehnıkadan bastap qaýipsizdik júıeleri, kólik jáne memlekettik qyzmetterge deıingi búkil sıfrlyq ınfraqurylymnyń negizi ekenin aıtty.
«Bul baǵytty jetildirmeı, shynaıy sıfrlyq egemendik týraly aıtý qıyn. Halyqaralyq tájirıbege súıensek, chıpter dızaıny ındýstrııasyn damytý úshin mindetti túrde óz fabrıkalarymyzdyń bolýy shart emes. Mysaly, óndiristik bazasy bolmaǵanyna qaramastan brıtandyq ARM kompanııasy búginde álemdegi smartfondardyń 95%-nyń arhıtektýralyq negizin qalyptastyryp otyr. Sol sııaqty, naryqtyq kapıtalızasııasy 4 trıllıon dollardan asqan NVIDIA kompanııasynyń da óz óndiris oryndary joq, biraq álemdegi eń iri mıkroshema óndirýshisi. Qazaqstannan osyndaı naryqtarǵa jańa oıynshylardy shyǵarý – strategııalyq mańyzy zor mindet», dedi ol.
Ázirge Qazaqstanda mıkroshemalardy jobalaý jáne synaqtan ótkizýge arnalǵan zerthana, ınfraqurylym, bilim berý baǵdarlamalary men ınjenerlik kadrlar jetkiliksiz. Ýnıversıtetter men óndiris arasyndaǵy baılanys ta álsiz. Sonyń saldarynan elimiz daıyn mıkroshemalardy ımporttaýǵa táýeldi bolyp otyr jáne jahandyq jartylaı ótkizgishter naryǵynan shet qalyp keledi.
Depýtattyń aıtýynsha, bul naryqtyń kólemi qazir júzdegen mıllıard dollarmen ólshenedi, al 2030 jyldary onyń mólsheri 1-2 trıllıon dollarǵa deıin ósedi dep kútiledi.
Ol Úkimetke chıpter dızaıny boıynsha keshendi memlekettik saıasat ázirleýdi usyndy.
«Keshendi memlekettik saıasat aıasynda ýnıversıtetter men kolledjderde zerthanalar ashý, mıkroshemalardyń ulttyq dızaın-ortalyǵyn qurý, jobalaý jáne testileý ınfraqurylymyn damytý, ǵylymı jobalar men startaptardy qoldaý, sondaı-aq mıkroshemalardy jobalaý boıynsha oqý baǵdarlamalaryn engizý kózdelýi tıis. Dál osy bazalyq ınfraqurylymdy qurý elimizdiń shynaıy ári turaqty sıfrlandyrýyn qamtamasyz etedi», dep túıindedi depýtat.
